Qostanaıda alaıaqtar kásipkerdiń 24 mıllıon teńgesin jymqyrǵan

QOSTANAI. KAZINFORM — Qostanaı oblysynda ınternet alaıaqtyq boıynsha iri is tergelip jatyr. Alaıaqtar kásipkerdiń 24 mıllıon teńgesin aldap alǵan. 

Polıtsııanyń málimetinshe, jábirlenýshige belgisiz bireýler qońyraý shalyp, ózderin salyq qyzmetkeri etip tanystyrǵan. Olar qate toltyrylǵan esep týraly jalǵan habar berip, enbek.kz portalynan keletin SMS-kodty jiberýdi suraǵan. 

Birneshe mınýttan keıin ekinshi qońyraý soǵylyp, alaıaqtar bul joly ózderin polıtsııa qyzmetkerimiz dep sendirgen. Alaıaqtar kásipkerdiń atynan nesıe alyp, aqshany shottarǵa aýdarý arqyly tergeýge kómektesýdi usynady.

Psıhologııalyq qysymǵa ushyraǵan kásipker birneshe nesıe alyp, alaıaqtar kórsetken esepshottarǵa 24 mıllıon teńge aýdarǵan.

Alaıaqtyq deregi boıynsha qylmystyq is qozǵaldy. Kıberqylmysqa qarsy is-qımyl departamentiniń qyzmetkerleri urlanǵan qarajat aýdarylǵan shottardyń ıelerin anyqtady. Olar Qazaqstannyń birneshe óńiri men kórshiles elderde ornalasqan. 

Quqyq qorǵaý organdary bóten aqshany qolma-qol aqshaǵa aınaldyrýǵa qatysý nemese bank derekterine qol jetkizý qylmystyq quqyq buzýshylyq bolyp tabylatynyn eske salady.

Osyǵan deıin Tarazda birneshe ret alaıaqtyq jasaǵan sheteldik azamat elden shyǵarylyǵandyǵy jóninde habarladyq.