Qostanaıda agroónerkásiptik keshendi damytý máseleleri talqylandy
QOSTANAI. QazAqparat - Qostanaı qalasynda QR Parlament Májilisi Agrarlyq máseleler jónindegi komıtetiniń jıyny ótti, dep habarlaıdy QazAqparat.
Oblystyq fılarmonııada ótken jıynǵa Qostanaı oblysynyń ákimi Arhımed Muhambetov, Májilistiń Agrarlyq máseleler komıtetiniń tóraǵasy Saparhan Omarov, aýyl sharýashylyǵy vıtse-mınıstri Berik Beısenǵalıev jáne eldiń basqa oblystarynan ókilder qatysty.
Kún tártibinde Agroónerkásiptik keshendi damytýdyń 2017-2021 jyldarǵa arnalǵan baǵdarlamasynyń oryndalýy barysyndaǵy kem-ketigi men artyqshylyǵy talqylandy.
Saparhan Omarov atap ótkendeı, «Agroónerkásiptik keshendi retteý máseleleri boıynsha ózgerister men tolyqtyrýlar engizý týraly» Zań jobasynyń Májiliske usynylǵanyna bir jyl boldy.
«Agroónerkásiptik kesheniniń negizgi salalary tehnologııalyq erekshelikterimen, óndirilgen ónimniń túri jáne mánimen ǵana emes, sonymen birge naryqtyq parametlerimen de aıqyndalady. Búginde aýyl sharýashylyǵynda AÓK retteý týraly bir ǵana zań bar. Byltyr aýyl sharýashylyǵy mınıstrligi QR Parlamenti Májilisine atalǵan zańǵa ózgerister engizý týraly usynys jasady. Jumysshy toptar qurylyp, zań barynsha saralandy. Barlyǵy 600 ózgeris depýtattardyń qaraýyna berildi», - dedi Saparhan Omarov.
Agrarlyq máseleler komıtetiniń múshesi Murat Temirjanovtiń sózinshe, zańnamadaǵy ózgeristerdi iske asyrý úshin respýblıkalyq bıýdjetten 11,8 mlrd teńge qajet.
AÓK retteý týraly zańdaǵy sońǵy ózgerister, birinshi kezekte, zamanaýı tehnologııalardy engizýge jáne aýyl sharýashylyǵy tehnıkalaryn jańartýdy, sondaı-aq mal sharýashylyǵynda tuqymdyq qaıta túrlendirýge baǵyttaýdy qarastyrady. Sonymen qatar, AÓK sýbektilerin qarjylandyrýdyń qoljetimdiligin arttyrý, ınvestıtsııalyq sýbsıdııalaý kólemin ulǵaıtý, aınalymdyq jáne ınvestıtsııalyq maqsattar úshin bank nesıeleriniń qoljetimdiligin keńeıtý jáne arzandatý baǵyttary bar.
