Qostanaıda aǵash qora órtendi
QOSTANAI. QazAqparat - Qostanaıda KSK shaǵyn aýdanyndaǵy turǵyn úı aýlasynan órt shyqty, dep habarlaıdy QazAqparat tilshisi.
Belgili bolǵandaı, Vvedenskaıa kóshesindegi 37/1 úı mańyndaǵy aǵash qorasy órtenip ketken.
«Mektepten shyqqan kezde jeke sektordyń órtenip jatqanyn kórdik. Birden muǵalimderge habarladyq. Úı aınalasynda balalardyń júrgenin kórdim», - dep habarlady oqıǵa kýágeri Dasha Boretskaıa.
Oblystyq TJD baspasóz qyzmetiniń habarlaýynsha, tótenshe jaǵdaı týraly aqparat saǵat 18:49-da túsken.
«Qora ishinde eski zattar men úsh gaz ballony bolǵan. Órt sóndirýshiler olardy oqshaýlap úlgerdi. Órt aýmaǵy 16 sharshy metrdi qurady. Zardap shekkender joq», - dedi TJD baspasóz hatshysy Ýálıhan Dosanov.
Oqıǵa ornyna №2 órt bóliminiń 2 arnaıy tehnıkasy men jeke quramnyń 11 qyzmetkeri jumyldyryldy. Órt saǵat 19:23-te sóndirildi.
