Qostanaıda adamdardy talap tastaǵan ıt emes, qasqyr bolyp shyqty
QOSTANAI. QazAqparat - Qostanaı oblysynda eki adamǵa qasqyr shapty, dep habarlaıdy QazAqparat oblystyq densaýlyq saqtaý departamentiniń karantındik jáne asa qaýipti ınfektsııalardy epıdemıologııalyq qadaǵalaý bóliminiń basshysy Lıýdmıla Nalobınaǵa silteme jasap.
Oqıǵa 5 naýryzda Arqalyq qalasyna qarasty Ashýtasty eldi mekeninde bolǵan. Túz taǵysy aýyl ishine kirip, eki adamdy talap tastady.
«Zertteý barysynda Ashýtasty aýylynyń 2007 jáne 1992 jyly týǵan turǵyndardy qasqyr talaǵany belgili boldy. Tıisinshe, olarǵa «Talanǵan baltyr jarasy» jáne «Talanǵan qol jarasy» dıagnozdary qoıyldy. Olarǵa medıtsınalyq kómek kórsetildi. Jábirlenýshilerdi antırabıkalyq ımmýndaý sharalary júrgiziledi. Qazirgi ýaqytta bala Arqalyq óńirlik aýrýhanasynda statsıonarlyq emdelýge jatqyzyldy. Al eresek adam ambýlatorlyq emdelý sharalaryn alyp jatyr. Profılaktıkalyq ımmýndaý kýrsyn taǵaıyndaý úshin qutyrǵan janýarlarmen baılanysta bolǵan adamdardyń sheńberi anyqtaldy», deıdi Lıýdmıla Nalobına.
Janýardan alynǵan patologııalyq materıal iriktelip, QR AShM VBjQK respýblıkalyq veterınarııalyq zerthanasyna jiberildi. Qasqyr qutyrý vırýsyn juqtyrýy múmkin.
Qoǵamdyq densaýlyq saqtaý departamenti Ashýtasty aýylynda epızootologııalyq-epıdemıologııalyq tekserý jumystaryn júrgizedi. Emdeý-profılaktıkalyq ımmýndaýdy qajet etetin adamdar toby anyqtalady.
«Epıdemııalyq jáne epızootııalyq oshaqtarda dezınfektsııalyq is-sharalar uıymdastyramyz. Adamdar arasynda aýrý jaǵdaılaryn boldyrmaý boıynsha jáne qutyrý aýrýynyń qaýiptiligi, onyń aldyn alý sharalary týraly túsindirý jumystaryn júrgizilýde», - deıdi departament ókili.
Osy oqıǵaǵa baılanysty Soltústik óńirlik aeromobıldi jedel-qutqarý jasaǵy málimet bergenin aıta keteıik.
Jasaq basshysy Sergeı Shmıdt 12 jasar balany qasqyrǵa uqsaıtyn ıt talaǵanyn aıtqan edi.
