Qostanaıda adam ólimine sebepker bolǵan avtobýs júrgizýshisi sottaldy
QOSTANAI. QazAqparat - Qostanaı qalalyq soty jaıaý júrginshini qaǵyp óltirgen avtobýs júrgizýshisine qatysty úkim shyǵardy, dep habarlaıdy QazAqparat oblystyq sottyń baspasóz qyzmetine silteme jasap.
Іs derekterinde kórsetilgendeı, oqıǵa bıyl 22 qańtarda oblys ortalyǵynda bolǵan. «Mersedes Venz» markaly avtobýsty tizgindegen júrgizýshi jaıaý júrginshiler jolaǵynan ótip bara jatqan áıeldi qaǵyp ketken. Jábirlenýshi aýrýhanada kóz jumdy.
«Sottalýshyǵa jazalaý sharasyn anyqtaý kezinde sot jábirlenýshiniń pikirin, jasalǵan qylmystyq quqyq buzýshylyqtyń sıpaty men qoǵamdyq qaýiptilik dárejesin, kináliniń jeke basyn, onyń ishinde qylmystyq quqyq buzýshylyq jasalǵanǵa deıingi jáne odan keıingi onyń minez-qulqyn eskerdi. Nátıjesinde Qostanaı qalasy №2 soty úkimimen avtobýs júrgizýshisi kináli dep tanylyp, 2 jyl 6 aı bas bostandyǵynan aıyrý jazasy taǵaıyndaldy. Ol kólik quraldaryn basqarý quqyǵynan 5 jyl merzimge shettetildi. Jazasyn eń tómengi qaýipsizdik qylmystyq-atqarý júıesi mekemesinde óteıtin bolady», - delingen oblystyq sottyń resmı saıtynda.
Sonymen qatar, sot «Altaır» óndiristik kooperatıvinen jábirlenýshiniń paıdasyna 1 344 234 teńge kóleminde materıaldyq zalal óndirdi. Sondaı-aq 2 mln teńge kóleminde moraldyq shyǵyn óteldi.
