Qostanaıda «Adaldyq kitaphanasy» ashyldy
QOSTANAI. QazAqparat - Qostanaı qalasynyń mamandandyrylǵan ákimshilik sotynyń oqý ortalyǵy bazasynda «Adaldyq kitaphanasy» ashyldy, dep habarlaıdy QazAqparat tilshisi.
Oblystyq sottyń baspasóz qyzmetinen málim etkendeı, bul kitaphananyń basty ereksheligi - kitaphanashysy jáne qyzmet kórsetetin adamdardyń joqtyǵynda. Al kitaphanaǵa kelýshiler tek qana tirkeý jýrnalyn paıdalanady. Sot qyzmetkerleri men kelýshiler jýrnalǵa qol qoıyp, kitaptar men gazet-jýrnaldardy oqı alady.
«Kitaphanany ashýdaǵy maqsat - qoǵamda senim bildirý atmosferasyn qalyptastyrý. Osyǵan uqsas mehanızm ondaǵan jyldar boıy skandınavııa elderinde qoldanylyp keledi. Joba turǵyndardyń boıynda parasattylyq jáne ádildik sııaqty moraldyq sıpattardy tárbıeleýge baǵyttalǵan. Bul faktorlar sybaılas jemqorlyqqa qarsy ımmýnıtettiń paıda bolýyna tikeleı áserin tıgizedi», - delingen oblystyq sottyń baspasóz habarlamasynda.
