Qostanaıda 9,3 mlrd teńgege sý nysandary salynady
QOSTANAI. QazAqparat - QR Parlamenti Májilisiniń depýtattary oblystaǵy partııalyq jobalardyń júzege asyrylý barysymen tanysty, dep habarlaıdy QazAqparat «Nur Otan» partııasy oblystyq fılıalynyń baspasóz qyzmetine silteme jasap.
Tobyl óńirine jumys saparymen kelgen bir top depýtattar Irına Aronova, Ivan Klımenko men Alber Raý «Nur Otan» partııasynyń jalpyulttyq «Qutty meken» jobasy aıasynda Altynsarın aýdanyna qarasty Dokýchaev aýylyndaǵy sý qubyrlaryn júrgizý jumystarymen tanysty.
Jalpy, bıyl Qostanaı oblysynyń aýyldarny aýyz sýmen qamtýǵa qomaqty qarajat bólindi. Sý nysandaryn salýǵa 9,3 mlrd tenge bıýdjet qazynasynan jumsaldy. Aıta ketý kerek, astyqty aımaqta 550-ge jýyq eldi meken bolsa, sonyń úshten biri ǵana ortalyqtandyrylǵan sý júıesine qosylǵan. Memlekettik baǵdarlamalardyń kómegimen aýyz sý máselesi birtindep óz sheshimin tabýda.
«Aımaqtardy damytý - 2020» baǵdarlamasy aıasynda Dokýchaev aýylynda 20 shaqyrym qubyr tartý kózdelýde. Jobanyń jalpy quny 779 mln teńgeni quraıdy. Ázirge birinshi uńǵymanyń qurylysy júrgizilip jatyr. Nysanda 40 adam jumys isteıdi. Qurylys jumystary aǵymdaǵy jyly aıaqtalady», - deıdi Altynsarın aýdanynyń ákimi Erlan Jamanov.
Aýdan ákiminiń sózinshe, Memleket basshysynyń tapsyrmasyna sáıkes Qostanaı oblysynda aýyzsýmen qamtý, sý tartý júıelerin salý boıynsha aýqymdy jumys atqarylýda. «Aq bulaq» baǵdarlamasy boıynsha 2011-2016 jyldar aralyǵynda Qostanaı oblysynda quny 34 mlrd teńge bolatyn 75 joba júze asty. Nátıjesinde 1,1 myń shaqyrym qubyr jańartyldy.
«Dokýchaev aýylyndaǵy sý júıesi - mańyzdy partııalyq jobalardyń biri. Sý tartý júıeleri arqyly bıyl Dokýchaev pen Shoqaı aýyldardy sýmen qamtylatyn bolady. Aýyz sý máselesi Qostanaı oblysynda sheshilip keledi. Mysaly, ótken jyldyń ózinde sýmen qamtıtyn 25 nysan jóndeýden ótip, 9,3 mlrd teńgege sý qubyry tartyldy. 12 aýyl 60 myńnan astam turǵyn oblys boıynsha tirshilik nárine qol jetkizdi» ,- deıdi QR Parlamenti Májilisiniń depýtaty Irına Aronova.
2015-2019 jyldar aralylyǵynda Qostanaı oblysynda 15 joba júzege asqan. «Nurly jol» jáne «Óńirlerdi damytý» baǵdarlamalary osylaısha óńirdiń ózekti máselesin ońtaıly sheship keledi. Bul baǵyttaǵy jumystar báseńdemek emes.
Odan keıin halyq qalaýlylary «Zýev» JShS-de boldy. Jumysshylarmen tildesip, suraqtaryna jaýap berdi.
