Qostanaıda 7 jasar qyz órtten aman qaldy
QOSTANAI. QazAqparat - Qostanaıda TJD qyzmetkerleri 7 jasar balany órtten qutqardy, dep habarlaıdy QazAqparat tilshisi.
27 qazan kúni saǵat 13:00 shamasynda oblystyq tótenshe jaǵdaılar departamenti kezekshi bólimi Qobylandy batyr kóshesindegi úıdiń birinen tútin shyǵyp jatqany týraly habarlama alady. Oqıǵa ornyna №2 arnaıy órt sóndirý bólimi baǵyttaldy. Kórshiler úı ishinde 7 jasar qyzdyń baryn aıtqan.
«Departament qyzmetkerleri kelgende 24 A úıdiń birinshi qabatynan tútin shyǵyp jatty. Qutqarýshylarǵa órt bastalǵan 167-shi páterdiń temir esigi qıyndyq keltirdi. Olar terezeni syndyryp kirdi. Áýeli, ishtegi bala shyǵarylyp, jedel járdem qyzmetimen aýrýhanaǵa jetkizildi. Qazir onyń jaǵdaıy birqalypty», - dep habarlady TJD baspasóz qyzmeti.
Órt pesh ústindegi tamaqtyń kúıýinen soń shyqqan. Shyǵyn kólemi anyqtalǵan joq. Órt aýmaǵyna 10 adam men 3 arnaıy tehnıka jumyldyryldy.
