Qostanaıda 7 tsıfrlyq ferma qurylady
QOSTANAI. QazAqparat - «Tsıfrlyq Qazaqstan» memlekettik baǵdarlamasy sheńberinde 7 tsıfrlyq ferma qurylatyn bolady. Bul týraly oblys ákimdiginiń aqparattandyrý, memlekettik qyzmetter kórsetý jáne arhıvter basqarmasynyń basshysy Erkebulan Ábdikárimov málim etti, dep habarlaıdy QazAqparat.
Ótken 2018 jyly tsıfrlandyrý salasynda bes basym baǵyt anyqtalǵan-dy. Olar: bilim, densaýlyq saqtaý, qaýipsizdik, turǵyn-úı kommýnaldyq jáne kólik ınfraqurylymy. Sonymen qatar, óńirimizde yntaly túrde aýyl sharýashylyq, shaǵyn jáne orta bıznes, ónerkásip jáne áleýmettik salalarynda sharalar iske asyryldy.
«Tsıfrlandyrý boıynsha jol kartasy jasalyp, josparlanǵan 130 is-sharanyń 103-i oryndaldy, osy maqsatta bıýdjetten shamamen 3 mlrd. teńge bólinip, tolyǵymen ıgerildi. Osy sharalardyń arqasynda oblys ekonomıkasyna edáýir serpin berdi. 2019 jyly qosymsha 6 baǵyt boıynsha jumys isteımiz. Atap aıtqanda, aýyl sharýashylyǵy, ónerkásip, qurylys, qalalyq basqarý, áleýmettik jáne ekologııa salalaryna basymdyq beriledi», - deıdi Erkebulan Ábdikárimov apparat májilisinde.
Qostanaı oblysy respýblıkada agroónerkásip kesheninde kósh bastap tur. Bıyl oblys ákiminiń tapsyrmasymen «Tsıfrlyq Qazaqstan» memlekettik baǵdarlamasy sheńberinde 7 tsıfrlyq ferma qurylatyn bolady.
Basqarma basshysy aıtqandaı, jer ıgerýde, qus sharýashylyǵynda, sút jáne et fermalarynda «aqyldy» tehnologııalar engizilip, ol aýyl sharýashylyǵy taýarlaryn óndirýshilerge shyǵyndy azaıtyp, ónimdilik pen paıda ákele bastady. Oblystaǵy tsıfrly tehnologııalar engizgen «Terra», «Sadchıkovskoe», «Jas qanat», «Qarqyn», «Zarechnoe», «Troıana» jaýapkershiligi shekteýli seriktestikteri men «Terra» sharýa qojalyǵy sekildi 7 agrofırmanyń tıimdiligi jyldam artyp keledi.
Oblys óndirisindegi Sokolov-Sarybaı ken óndirý birlestigi, «Varvarınskoe», «Qostanaı mıneraldary», «Baıan sulý» AQ, «Prombaza-7» JShS sekildi iri kásiporyndar óndiriske Indýstrııa 4.0 pen tsıfrlandyrý elementterin qosty. Máselen, Sokolov-Sarybaı ken óndirý birlestiginiń Qashar kenishinde ótken jyldan beri jumys «aqyldy karer» tehnologııasymen júredi. Qazir Qorjynkól jáne Sokolov-Sarybaı kenishteri de jumysty barynsha jeńildetetin, ýaqyt únemdeıtin osyndaı ozyq tehnologııaǵa kóship jatyr.
