Qostanaıda 64 jastaǵy zeınetkerdiń ólimine qatysty úsh kúdikti qamaýǵa alyndy
ASTANA. QazAqparat - Qostanaı oblysynyń ІІD qylmystyq polıtsııa basqarmasynyń qyzmetkerleri kúdiktilerdi birer saǵattyń ishinde qolǵa túsirdi, dep habarlaıdy «QazAqparat» HAA tilshisi.
Zorlyq-zombylyq belgileri bar zeınetkerdiń denesi Prıgorodnaıa kóshesindegi úıdiń birinen shyqqan órtten keıin tabylǵan. Qaıtys bolǵan adam sol úıdiń ıesi bolǵan.
«Polıtsııa qyzmetkerleri oqıǵa tirkelgennen keıin birden izdeý jumystaryn bastady. Jedel izdestirý sharalary barysynda 34, 40 jáne 43 jastaǵy úsh kúdikti ustaldy. Olardyń biri áıel. Úsheýi de buryn tonaý men urlyq úshin sotty bolǵandar», - dep habarlaıdy Qostanaı oblysynyń ІІD baspasóz qyzmeti.
Quzyrly organnyń habarlaýynsha, tergeý barysynda pıǵyly jaman úsh kúdiktiniń ishimdik iship, bótendi tonaýǵa keliskeni anyqtalǵan. Oılanbastan úsheýi jaqyn mańdaǵy úıge tonaý maqsatynda kirip ketse kerek. Eń ókinishtisi, esikti úıdiń ıesi ashqan. Kisi óliminen keıin úsheýi úıden teledıdar men eki uıaly telefondy qoldy etken.
Qazirgi ýaqytta kúdiktilerdiń úsheýi de ýaqytsha ustaý oqshaýlaǵyshyna qamaldy. Atalǵan oqıǵa boıynsha QR QK 99-baby 2-bóligi (kisi óltirý) boıynsha sot aldy tergeý amaldary júrgizilip jatyr.
