Qostanaıda 60 turǵynǵa páter kilti tabystaldy
QOSTANAI. QazAqparat - QR Táýelsizdigi kúni merekesi qarsańynda Arhımed Muhambetov qostanaılyqtarǵa «Severnyı» shaǵynaýdanyndaǵy jańa páterlerdiń kiltin tapsyrdy, dep habarlaıdy QazAqparat tilshisi.
Búgin «Nurly jer» memlekettik baǵdarlamasymen salynǵan páterler 60 turǵynǵa berildi. Olardyń barlyǵy - «Turǵyn úı qurylys jınaq banki» AQ salymshylary. Jalpy, jyl basynan beri myń shaqty turǵyn baspanaly bolǵan.
«Budan bólek shaǵynaýdandy abattandyrýǵa 2 mlrd teńge qarastyrylyp otyr. Esterińizde bolsa, byltyr osy aýmaqtan 2 kópqabatty úı paıdalanýǵa berilgen. Aldaǵy ýaqytta taǵy 4 úı salynyp, 2018 jyldyń sońyna deıin turǵyndarǵa tapsyrylady. Jospar boıynsha, osy «Severnyı» shaǵynaýdanynda 11 kópqabatty úı salamyz», - dedi aımaq basshysy.
«Qazaqstannyń Turǵyn úı qurylys jınaq banki» AQ oblystyq fılıalynyń dırektory Dáýren Saýdabaevtyń aıtýynsha, bıyl oblysta 14 úı salyndy. Mundaǵy páterlerdiń baǵasy 1 sharshy metrine 148 000- 153 000 teńge aralyǵynda. Olardyń barlyǵy «Nurly jer» arqyly turǵyzyldy.
Qostanaı oblysynda turǵyn úı qurylys jınaq júıesi arqyly nesıelik úı baǵytynda 2018 jyly 1000-nan astam páter paıdalanýǵa beriledi dep josparlanýda.
