Qostanaıda 6 temirjol vokzaly jóndelip jatyr

QOSTANAI. KAZINFORM — Qostanaı oblysynda 6 temirjol vokzaly jóndeýden ótip jatyr. Jobany iske asyrýǵa 5,3 mlrd teńge bólindi. 

Jańǵyrtý jumystary Qostanaı qalasynda, Arqalyq, Tobyl, Jelezorýdnaıa, Amanqaraǵaı jáne Qusmuryn stantsııalarynda júzege asyrylyp jatyr.

Rekonstrýktsııa aıasynda jolaýshylar men temirjol qyzmetkerlerine qolaıly jaǵdaı jasaýǵa baǵyttalǵan keshendi sharalar qarastyrylǵan. Ǵımarattardyń qasbetteri jańartylyp, ishki úı-jaılar qaıta jóndeledi: shatyr aýystyrylady, kútý zaldary, kassa aımaqtary men sanıtarlyq toraptar jańartylady. Múmkindigi shekteýli azamattar úshin pandýstar ornatý kózdelgen.

Qaýipsizdik máselelerine de erekshe nazar aýdarylyp otyr. Beınebaqylaý jáne daýys zoraıtqysh júıeleri jańartylady. Sonymen qatar irgeles aýmaqtardy abattandyrý josparda bar — kógaldandyrý, oryndyqtar ornatý, jaryqtandyrýdy jańartý jáne avtoturaq aımaqtaryn jaqsartý jumystary júrgiziledi.

— Jobanyń júzege asyrylýy óńir turǵyndary men qonaqtary úshin vokzaldardy barynsha jaıly, zamanaýı jáne qaýipsiz etedi, sondaı-aq oblystyń kóliktik nysandarynyń kelbetin aıtarlyqtaı jaqsartady, — delingen aqparatta.

Aıta keteıik, Qostanaı oblysynyń jylý jelilerin rekonstrýktsııalaýǵa 2,2 mlrd teńge bólindi.