Qostanaıda 6 myńǵa jýyq adam jumyssyz júr
QOSTANAI. QazAqparat - Byltyr Qostanaı qalasy ákimdiginiń jumyspen qamtý bólimine 7 165 adam júgingen. Bul týraly búgin qala ákimi Bazyl Jaqypov turǵyndarǵa esep berý kezdesýinde aıtty, dep habarlaıdy QazAqparat.
2017 jyly «Kásipkerlikti qoldaý kartasy» boıynsha qalada 7 ınvestıtsııalyq joba júzege asyrylǵan. Bul jobalarǵa 13 mlrd teńge jumsaldy. Munyń syrtynda 308 shaǵyn nysan paıdalanýǵa berilip, barlyǵy 570 jańa jumys orny ashyldy. Alaıda, qaladaǵy jumyssyzdyq kórsetkishi áli de tómender emes.
«Byltyr ákimdiktiń jumyspen qamtý bólimine 7 165 adam jumys surap kelgen. Jalpy, qalada 5 895 adam jumyssyzdar sanatyna kiredi. Turǵyndarǵa áleýmettik qoldaý kórsetý boıynsha jańa jumys oryndaryn ashý kózdelgen. Bıyl taǵy 6 iri ınvestıtsııalyq joba qolǵa alynbaq. Bul tusta jeke ınvestorlardyń kómegi zor. Máselen, byltyr «Mart» saýda ortalyǵynyń qasynan salynǵan «McDonald's» meıramhanasy 100 qostanaılyqty jumysqa aldy. Kásipker óz qaltasynan 800 mln teńgege jýyq qarjy shyǵardy», - dedi qala ákimi.
Bazyl Jaqypovtyń aıtýynsha, nátıjeli jumyspen qamtý baǵdarlamasy aıasynda 1 370 turǵyn turaqty jumys tapty. Munyń syrtynda, 338 otbasyǵa áleýmettik kómek usynyldy. Buǵan bıýdjetten 26 mln teńge qarastyryldy.
«Qalada 6 889 múmkindigi shekteýli jan turady. Olardyń shıpajaıda em alýyna jaǵdaı jasalynyp keledi. Aldaǵy ýaqytta ınvataksılerdi tsıfrlandyrý boıynsha birneshe jobany iske asyrmaqpyz. Atap aıtqanda, qamkóńil jandar úshin mobıldi qosymsha jasalynyp jatyr. Olar qaldaǵy ınvataksılerdiń baǵytyn smartfondar arqyly baqylap, shaqyra alady. Qalada ınvataksı qyzmetine 600 adam júginedi», - deıdi Jaqypov.
Qala ákimi aıtqandaı, Uly Otan soǵysy ardagerleri de áleýmettik kómekterden tys qalmaıdy. Búginde qaladaǵy 982 soǵys ardagerine aı saıyn turmystyq tehnıkalarǵa sertıfıkattar berilip otyrady. 2017 jyly bul sharaǵa 92 mln teńge bólingen.
