Qostanaıda 6 memqyzmetshi demalys kezinde erkinen tys jumysqa shyqqan

QOSTANAI. QazAqparat - Qostanaı oblysynda 6 memlekettik qyzmetshi óz erkinen tys eńbek demalysyn buzýǵa májbúr bolǵan. Bul týraly Ádep jónindegi keńes otyrysynda belgili boldy, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamenti memlekettik qyzmetshilerdiń eńbek demalysy boıynsha saraptama jasady. Nátıjesinde, 283 qyzmetker óz erikterimen eńbek demalysyn buzyp, jumysqa shyqqan.

«Anonımdi saýalnamaǵa qatysqan 1545 memqyzmetshi jumys oryndarynda jyl saıyn eńbek demalysy qarastyrylatynyn kórsetti. Saraptama qorytyndysy boıynsha 6 adamnyń óz erkinen tys jumysqa shaqyrtylǵany anyqtaldy. Bul qyzmetkerler Amangeldi, Áýlıekól, Qarsaý, Naýyrzym aýdandary, jolaýshylar kóligi jáne avtomobıl joldary men veterınarııa basqarmalarynda jumys isteıdi. Memlekettik qyzmet salasyndaǵy zań talaptarynyń buzylmaýy úshin tıisti saraptama jumystary jasaldy», - dedi agenttiktiń Memlekettik qyzmet salasyn baqylaý basqarmasy basshysynyń mindetin atqarýshy Aıdos Qasenov.

Memlekettik qyzmetshilerge turǵyn úı berý máselesi kún tártibinen túspek emes. Oblystaǵy 5955 memlekettik qyzmetshiniń 1892-si baspanaǵa nemese turǵyn úı salý úshin beriletin jer ýchaskesine muqtaj.

«Búginde 1171 memqyzmetshi turǵyn úı kezeginde tur. Degenmen, turǵyn úı kezegi boıynsha oblysta birneshe zańsyzdyqtar anyqtaldy», - dedi A.Qasenov.

Ádep keńesinde aıtylǵan zań buzýshylyqtar boıynsha, agenttik tarapynan aýdan, qala ákimderine sybaılas jemqorlyq táýekelderin boldyrmaý jáne qyzmetkerlerdiń tártiptik jaýapkershilikterin qaraý týraly usynystar berildi.