Qostanaıda 58 jyl buryn shańyraq kótergen januıa «mereıli otbasy» atandy
Bıylǵy konkýrstyń ekinshi kezeńine 90-nan astam otbasy qatysty. Uıymdastyrýshylar olardyń arasynan 20 áýletti iriktedi. Baıqaýdyń oblystyq kezeńi E. Ómirzaqov atyndaǵy Qostanaı oblystyq fılarmonııada ótti. Marapattaý rásimine Qostanaı oblysynyń ákimi Arhımed Muhambetov qatysyp, jeńimpazdardy quttyqtady.
«Ata-babamyzdyń urpaq tárbıeleýdegi salt-dástúrleri halqymyzdyń asyl qazynasyna aınaldy. El ishindegi birlik-otbasynan bastalady. Ómirdiń ózi dáleldep bergen shyndyq osy. Memlekettiń tabysy ár shańyraqtaǵy shattyqpen ólshenedi. Sondyqtan elimizde otbasy ınstıtýtynyń damýyna erekshe kóńil bólinýde. Elbasynyń qoldaýymen ótip jatqan «Mereıli otbasy» baıqaýy - osynyń dáleli», - dedi óńir basshysy.
Uıymdastyrýshylar alqasynyń uıǵarymymen qatysýshylar «Ónegeli otbasy», «Parasatty otbasy», «Mereıli otbasy» atalymdary boıynsha toptastyrylǵan. «Ónegeli otbasy» atalymynyń jeńimpazy Qadyr jáne Maıra Qarjaýovtardyń otbasy tanyldy. Al «Parasatty otbasy» atalymynda Semagınder shańyraǵynyń (Taran aýdany) mereıi ústem boldy.
Sonymen «Mereıli otbasy» atalymynda arqalyqtyq Almatovtar otbasy jeńiske jetti. Jeńimpazdarǵa 300 myń teńgeniń sertıfıkaty tapsyryldy.
«Jubaıym Gúljan Fazyljanqyzy ekeýmizdiń otbasyn qurǵanymyzǵa 58 jyl toldy. Búginde 8 baladan 16 nemere, 5 shóbere kórip otyrmyz. Bizdi osyndaı jaǵdaıǵa jetkizgen ulttyq tárbıeniń arqasy. Bizdiń memleketimiz nyǵaıý úshin halqymyz kóbeıý kerek. Sondyqtan jastar ár otbasynda kem degende 4-5 bala bolýy tıis, ár balanyń óziniń nesibesi bar. Otbasy turaqty bolsa, memlekettik qundylyqtary saqtalady, - dedi jeńimpaz otbasynyń otaǵasy, belgili ólketanýshy Oreken Almatov.
Endi Almatovtar otbasy osy ulttyq baıqaýdyń respýblıkalyq kezeńinde oblys namysyn qorǵaıdy.
