Qostanaıda 540 eldi meken ońtaılandyrylady
QOSTANAI. QazAqparat - Qostanaıda bolashaǵy bar aýyldar anyqtalýda. Bul týraly oblys ákimi Arhımed Muhambetovtiń qatysýymen ótken oblystyq máslıhattyń kezekten tys sessııasynda belgili boldy, dep habarlaıdy QazAqparat tilshisi.
Máslıhat jıynyna qatysqan Arhımed Muhambetov bıyl «Aýyl - el besigi» baǵdarlamasynyń bastalatynyn aıtty. Sol sebepti, shalǵaı aýyldardy ońtaılandyrý joldary kún tártibinen túspeýi tıis.
«Qazir oblystaǵy 548 aýyldyń 151-i bolashaǵy bar eldi mekender qataryna endi. Arnaıy komıssııalar olardy damytý josparlaryn belgileıdi. Turǵyndary 100-den kem aýyldardy ońtaılandyrý usynylady. Ázirge, biz 10 aýyldy damytýǵa ekpin salamyz. Ári qaraı olardyń qatary ulǵaıa bermek. Árıne, bul maqsatqa da birigip qarjylandyrý qajet. Investıtsııa tartý joldaryn da qarastyramyz», - dedi oblys ákimi.
2020 jyldyń 1 qańtarynan bastap barlyq aýyldyq okrýgter bıýdjettik úderisti jáne kommýnaldyq menshikti derbes basqarýǵa kóshedi. Sondyqtan qyzmet tıimdiligin arttyrý maqsatynda aýyldyq okrýgterdi biriktirý jolymen ońtaılandyrý múmkindigin qarastyrý qajet.
Mysaly, Qostanaı aýdanynyń I. F. Pavlov atyndaǵy aýyldy taratý usynyldy. Onda 494 adam turady. Ákimdikte 6 adam jumys isteıdi jáne jeke apparaty bar. Endi osy aýyldy 6 shaqyrym qashyq ornalasqan Aleksandrovka aýylyna qosý qajettiligi aıtyldy. Atalǵan aýylda 1723 adam turady.
Oblys ákimdiginiń ekonomıka jáne bıýdjettik josparlaý basqarmasynyń basshysy Gúlbaram Musaǵazınana eldi mekenderdi gazben, aýyz sýmen qamtý baǵytyndaǵy josparlarǵa, atqarylyp jatqan jumystarǵa sholý jasady.
«Bıyl bıýdjetten qurylys salasyna 56,2 mln teńge bólinedi. Onyń 47,9 mln teńgesine Qonaı shaǵyn aýdanyndaǵy káriz jelileri jańartylady. 7,3 mln teńge Indýstrııalyq aımaqta qajetti ınjenerlik ınfraqurylymdardy júrgizý jobasynyń smetalyq qujattaryn daıyndaýǵa shyǵyndalady. Gaz-transporttyq júıelerdi damytý jobasy da nazarda. Oǵan 44,8 mln baǵyttaý kózdelgen. Bul qarjy ıgiligin Áýlıekól aýdanynyń Áýlıekól, Qusmuryn, Chernıaev, Qamysty aýdanynyń ortalyǵy jáne Altynsarın, Adaev, Bestóbe aýyldary kóredi», - dedi ol.
Basqarma basshysy halyqtyń hal-ahýalyn arttyra túsý de jospardan tys bolmaıtynyn aıtty.
«Jumyspen qamtýdy úılestirý jáne áleýmettik baǵdarlamalar basqarmasyna 198,7 mln teńge bólinedi. Onyń 100 mln teńgesi múmkindigi shekteýli jandardy tehnıkalyq jáne járdemshi, júrip-turý quraldarymen qamtýǵa jumsalady. Qalǵan 98,7 mln teńgege qoǵamdyq jumysqa tartylǵan azamattardyń aılyǵyn kóterýge baǵyttaý kózdelip otyr. Jospar boıynsha, olardyń jalaqysy 1,5 esege deıin kóbeıedi», - deıdi G.Musaǵazına.
Buǵan deıin habarlaǵanymyzdaı, bıýdjetten oblystyq jolaýshylar kóligi basqarmasyna 791,5 mln teńge qarastyrý kózdelgen. Onyń 747,2 mln teńgesi aýdandyq mańyzdaǵy avtojoldardy jóndeýge jumsalmaq.
