Qostanaıda 500 jumys ornyn qamtıtyn jańa ortalyq ashyldy
QOSTANAI. QazAqparat - Qostanaılyqtar asyǵa kútip júrgen «Kostanay Plaza» oıyn-saýyq ortalyǵy saltanatty túrde ashyldy, dep habarlaıdy QazAqparat tilshisi.
Ashylý saltanatyna oblys ákimi Arhımed Muhambetov, Qostanaı qalasy ákimi Bazyl Jaqypov pen «BK-Stroı» kompanııasynyń basshysy Igor Kım qatysyp, lentasyn qıdy.
«Qala turǵyndary men qonaqtaryna jaqsy jaǵdaı jasaý bizdiń basty mindetimiz. Búgin taǵy bir qýanyshty sáttiń kýási bolyp otyrmyz. Bul - oblys ortalyǵyndaǵy erekshe ǵımarattardyń biri. Qurylys jumystaryna jergilikti qurylys materıaldary qoldanyldy. Investıtsııa kólemi 4 mlrd teńgeni qurap otyr jáne 500 jumys orny ashyldy», -dep atap ótti Arhımed Muhambetov.
«Kostanay Plaza» - bul oblystaǵy eń iri oıyn-saýyq nysany. Kólemi - 18424 sharshy metr. Ǵımarat Qostanaıdyń soltústik-batysyndaǵy «Altyn Arman» shaǵyn aýdanynda ornalasqan. «Kostanay Plaza» mańyndaǵy avtorturaqqa bir mezette 600 kólik aıaldaı alady.
Bul ǵımarat zamanaýı talaptarǵa jaýap bere alady. Gıpermarket, Fýd-kort (tamaqtaný aımaǵy), feshn-ındýstrııa taýarlary dúkeni, turmystyq tehnıkalar satylatyn oryn, balalarǵa arnalǵan "Funky town" saıabaǵy jumys isteıdi. Al kınoteatr 730 adamǵa arnalǵan.
Oıyn-saýyq ortalyǵynyń ashylýyna oraı qaladaǵy №38 avtobýstyń qozǵalys baǵyty da ózgerdi. Endi turǵyndar «Altyn Arman» saýda úıine qıyndyqsyz qatynaı alady.
