Qostanaıda 500-ge jýyq bala ulttyq sport mektebinde bilim alyp júr
«Búgin Qostanaı aýdanynyń Zarechnoe aýylyndaǵy «Arǵymaq» ıppodromyna bardym. Qazirgi ýaqytta ulttyq sport túrleriniń balalar-jasóspirimder sport mektebinde 495 sportshy shuǵyldanady, onyń ishinde 167 oqýshy Qostanaı qalasynan, 103 oqýshy Tobyl qalasynan jáne 195 oqýshy Zarechnoe aýylynan. Kólemi 34h65 m, jalpy aýdany 2 210 sharshy metr bolatyn jańa manej salý týraly sheshim qabyldandy, osy jyldyń sońyna deıin nysandy paıdalanýǵa berý josparlanǵan. Manej salý aldaǵy ýaqytta ulttyq at sport túrlerimen aınalysatyn sportshylar úshin ǵana emes, múgedek balalardy ońaltý úshin de sabaqtar ótkizýge múmkindik beredi. Sporttyq sektsııada sportpen shuǵyldaný múgedekterdi ońaltý men áleýmettik beıimdeýdiń joǵary tıimdi ádisi bolyp sanalady» dep atap ótti Instagram paraqshasynda aımaq basshysy Arhımed Muhambetov.
Aıta ketý kerek, «Arǵymaq» ıppodromynda jappaı is-shara jıi ótkizilip turady, oǵan respýblıkanyń barlyq sportshylary qatysady.
Qostanaılyq sportshylar at sportynyń ulttyq túrleri boıynsha Qazaqstan Respýblıkasynyń chempıonattaryna únemi qatysady.
«Sondaı-aq, sapar barysynda Zarechnoe aýylynda ornalasqan «Qazaq tulpary» JShS-da boldym. Kásiporyn basshylyǵy qostanaı asyl tuqymdy jylqy malyn satyp alý týraly ótinish bildirdi. Otandyq jylqy tuqymyn qalpyna keltirý, saqtaý jáne odan ári jetildirý úshin atalǵan jylqy zaýytynyń bazasynda qostanaı tuqymynan bıe satyp alý týraly sheshim qabyldandy. Sapar qorytyndysy boıynsha Qostanaı aýdanynyń ákimi J.K. Taýkenovke jáne oblys ákimdiginiń qurylys basqarmasynyń basshysyna osy jobalardy iske asyrý úshin barlyq qajetti qujattardy daıyndaýdy tapsyrdym» dep jazady Arhımed Muhambetov.
