Qostanaıda 50 myńnan asa jas maman aýyl sharýashylyǵynda eńbek etedi
QOSTANAI. QazAqparat - Qostanaıdaǵy qazaq drama teatrynda «Jas Otan» jastar qanaty oblystyq fılıalynyń kezekti konferentsııasy ótti, dep habarlaıdy QazAqparat tilshisi.
Basqosýǵa qatysqan Qostanaı oblysy ákiminiń orynbasary Marat Júndibaev jastardyń oblys ekonomıkasy men qoǵamdyq ómirine qosar úlesi týraly aıtty.
«Óńir turǵyndarynyń 210 myńnan astamy nemese 23%-y jastar. Óndiris oryndarynda 80 myń, al aýyl sharýashylyǵynda 50 myńnan astam jas maman eńbek etedi. Al 5 myń jas memlekettik qyzmetterde júr. Búginge deıin 30 myń jas óskin túrli uıymdarǵa tirkelgen. Mine, sol sebepti bizdiń oblystyń barlyq jaǵynan damýy - jastardyń qolynda», - dedi M.Júndibaev.
Sonan soń «Jas Otan» JQ oblystyq fılıalynyń tóraǵasy Erlan Tóletaev sóıledi. Onyń sózinshe, elimizde jastardyń bastamalaryna jaqsy jaǵdaı jasalǵan. Kásip ıgeremin degenderge kedergi joq.
«Biz osy baǵytta jumys atqaryp kelemiz. Partııanyń kadrlyq rezervin jasaqtaý da bizdiń mindetke jatady. Tipti, qazirdiń ózinde 7 jas depýtat máslıhattyń túrli deńgeılerinde oblystyń qoǵamdyq-saıası ómirine aralasyp júr», - dedi «jasotandyqtar» jetekshisi.
«Jas Otan» jastar qanaty «Sátti qadam» baǵdarlamasy boıynsha eki jylda 2 myń jas mamandy jumysqa ornalastyrdy. Erlan Tóletaevtyń sózine súıensek, qazir «Jas Otannyń» 35%-y - stýdentter. Jastar qanaty oblystyń áleýetti degen 25 kompanııasymen memorandým jasaǵan.
Jıyn sońynda úzdik jas mamandar oblys ákiminiń gramotasymen marapattaldy. Sondaı-aq, qarasha aıynda Astanada ótetin «Jas Otan» jastar qanatynyń kezekti IV Sezine baratyn jastar irikteldi.
