Qostanaıda 50 myń adam tegin jer kezeginde tur: qansha ýchaske berildi
ASTANA. KAZINFORM — Qostanaı qalasynda jeke turǵyn úı salý úshin tegin jer telimin alýǵa shamamen 50 myń adam kezekte tur. Qazir qaladaǵy Qunaı turǵyn alabynda jer ýchaskelerin bólý jumystary jalǵasyp jatyr, dep habarlaıdy Kazinform agenttiginiń tilshisi.
Qazaqstannyń Jer kodeksine sáıkes, elimizdiń árbir azamaty jeke turǵyn úı qurylysy úshin kólemi 10 sotyqqa deıingi jer ýchaskesin tegin alýǵa quqyly. Alaıda jer telimderi aýmaqtar daıyndalyp, bos jer bolǵan jaǵdaıda ǵana beriledi.
Qostanaı qalasy ákimdiginiń jer qatynastary bóliminiń málimetinshe, qazir jeke turǵyn úı qurylysyna arnalǵan jerdi alý úshin 50 myń adam kezekte tur. 2026 jyldyń sáýir aıynan bastap qaladaǵy Qunaı turǵyn alabynda jer ýchaskelerin bólý bastalǵan.
Joba boıynsha jeke turǵyn úı salýǵa arnalǵan barlyǵy 1967 jer ýchaskesi qarastyrylǵan. Onyń 14-i 2024 jylǵy sý tasqynynan zardap shekken turǵyndarǵa berilgen. Bul ýchaskelerge bir qabatty turǵyn úıler salynǵan.
Taǵy 1668 ýchaske kezekte turǵan azamattarǵa úlestiriledi. Olardyń kólemi 8 sotyqqa deıin. Bul aýmaqta 967 bir qabatty jáne 701 eki qabatty úı salý josparlanǵan.
2026 jylǵy 13 sáýirden bastap mamandar kezekte turǵan azamattarǵa jerdi rásimdeý qajettigi týraly habarlaı bastaǵan. Turǵyndarǵa telefon arqyly qońyraý shalyp, «1414» servısi arqyly da SMS-habarlama jiberilgen.
Qazirgi ýaqytta buryn jasaqtalǵan tizimdegi 1668 adamnyń barlyǵyna habar berilgen. Azamattardyń ótinishteri men qujattaryn qabyldaý qorytyndysy boıynsha ákimdik jer ýchaskelerin berý týraly 724 qaýly qabyldaǵan.
Buǵan deıin jer telimin alǵan azamattar ony bos qaldyrýǵa nemese basqa maqsatta paıdalanýǵa bolmaıtyny habarlanǵan edi. Qoldanystaǵy talap boıynsha, alty aı ishinde ýchaskeni qorshap, qurylys jobasynyń eskızin kelisý qajet. Úı bekitilgen jobaǵa saı salynýy kerek. Al qurylysty úsh jyl ishinde aıaqtaý mindettelgen.
Sonymen qatar Aqtóbede ıgerilmegen 36,6 myń gektar jer telimi memleketke qaıtarylǵany belgili boldy.