Qostanaıda 5 jataqhana salynady
QOSTANAI. QazAqparat - Qostanaı oblysynyń Altynsarın aýdanyndaǵy «Jaılaý» demalys bazasynda aımaqaralyq aqparattyq lageri ótti, dep habarlaıdy «QazAqparat» HAA tilshisi.
«JAS QOSTA» dep atalatyn sharaǵa Qostanaı oblysy ákiminiń orynbasary Marat Júndibaev qatysty. Ol 2018 jyly atqarylǵan jumystarǵa toqtaldy. Aıtýynsha, óńirde jastar bastamasymen iske asyp jatqan jobalar kóbeıgen.
«JAS QOSTA» aqparattyq alańynda bizdiń jastarǵa esimi elge belgili spıkerler tájirıbelerimen bólisip jatyr. Bul olarǵa serpin bereri sózsiz. Jalpy osy jyly jastar saıasatyn iske asyrý úshin bıýdjetten 200 mln teńge bólindi. Barlyǵy 67 iri joba jasaldy. Kelesi jyly bul soma ósedi. Bıyl bizdiń oblystyń jastary birtalaı jetistikke jetip, abyroıymyzdy asyrdy. Ánshi Ámire men boksshy Vasılıı Levıt, shahmatshy Dınara Asaýbaeva men opera sheberi Súndet Baıǵojın elimizdi álemdik arenalarda tanytty, - dedi Marat Júndibaev.
Elbasy 2019 jyldy «Jastar jyly» dep jarııalaýdy usynǵany belgili.
Marat Júndibaev aıtqandaı, oblys ákimi endigi jylǵa jastardyń bilim alýyna 200 grant bóldi. Onyń 100-i densaýlyq saqtaý salasyna baǵyttalmaq. Sebebi, óńirde dárigerler tapshylyǵy baıqaldy.
Taǵy bir jańalyq, oblysta bes jataqhana paıdalanýǵa beriledi. Onyń ekeýi Qostanaı memlekettik pedagogıkalyq ýnıversıtetine tıesili bolsa, qalǵan úsheýin kolledjder salady. Aıta keteıik, Qostanaıdaǵy JOO-larda 17 myń stýdent, kolledj-lıtseılerde 23 myń stýdent bilim alady.
- Osy jyly oblystyq jastar saıasaty basqarmasyna stýdenttik keńesti jandandyrýdy tapsyrdyq. Óıtkeni, mańyzdy bastamalardy qolǵa alǵanda jastardyń pikiri mańyzdy. Bul ıdeıany oblys ákimi qoldap otyr, - deıdi ákim orynbasary.
2019 jyldyń kóktem aıynda oblystyq jastar saıasaty basqarmasy men jastar resýrstyq ortalyǵy bir ǵımratqa kóshiriletini aıtyldy. Olar jumystaryn jańadan salynyp jatqan Ulttyq-mádenı ortalyqta júrgizbek. Ǵımaratta 1000 orynǵa arnalǵan kontsert zaly bolady.
