Qostanaıda 46 jastaǵy áıel bastaǵan top mal urlyǵymen aınalysyp kelgen

QOSTANAI. QazAqparat – Áýlıekól aýdanynda 8 jylqy men 4 sıyrdy aıdap áketken urylar toby qolǵa tústi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Birneshe adamnyń malyn urlaǵan kúdiktilerdi Áýlıekól aýdanynyń polıtseıleri ustady. Aýdandyq polıtsııa bólimine ótken jyldyń tamyz aıynan bastap turǵyndardan mal urlyǵy týraly aryz túse bastady. Jergilikti turǵyndardyń aıtýynsha, bir úıir jylqy men iri qara mal jeke sharýashylyqtardyń aýmaǵynan joǵalyp ketken.

Polıtseıler jedel is-sharalar ótkize bastady. Áýlıekól aýdandyq polıtsııa bólimi bastyǵy Janserik Hasanov aıtqandaı, jedel ýákilder Novonejın aýylynda turatyn 46 jastaǵy áıel bastaǵan qylmystyq topty anyqtaǵan. Onyń quramynda taǵy 4 adam bolǵan.

«46 jastaǵy áıel urlyqtyń shemasyn jasaǵan. Aldymen «Vaz-2107» avtokóligi arqyly aýyldardy aralap, sharýashylyqtaǵy maldardy baqylap alady. Keıin kúdiktilerdiń biri jaıylyp júrgen maldy arnaıy orynǵa aıdap aparǵan, al qalǵandary maldy baýyzdap otyrǵan. Polıtsııa qyzmetkerleri Shıli, Pervomaı jáne Dıev aýyldarynan urlanǵan maldyń aman qalǵanyn jábirlenýshilerge qaıtardy. Tergeý amaldary júrgizilip jatyr», - deıdi polıtsııanyń baspasóz hatshysy Irına Bejenar.

Qazir urylardyń ústinen QR QK 188-baby boıynsha is qozǵaldy. Olardyń kinási dáleldense, 5 jyldan 10 jylǵa deıin sottalýy múmkin.