Qostanaıda 46 mekeme eńbekaqy zańyn buzǵan
Oblystyq Revızııalyq komıssııa tóraǵasy Dmıtrıı Kostıýkovtyń málimetinshe, byltyr revızııalyq komıssııa 18 aýdıtorlyq shara ótkizip, 115 nysandy teksergen. Shara barysynda 1,4 mlrd teńgeniń maqsatsyz jumsalǵany anyqtalyp, qarjy qaıtadan bıýdjetke qaıtarylǵan.
«Býhgalterlik esep júrgizý barysynda 13,6 mlrd teńge qarjynyń negizsiz jumsalǵany anyqtaldy. Munyń syrtynda byltyr 2,9 mlrd teńge kólemindegi bıýdjet qarjysy men memleket aktıvteri tıimsiz paıdalanylǵan. Al tıimsiz josparlanǵan qarjy kólemi 1 mlrd teńgeden asyp jyǵylady. Búginge deıin ysyrap bolǵan qarjynyń 407,6 mln teńgesi qaıta óndirilip alyndy», - deıdi Dmıtrıı Kostıýkov.
Oblystyń qarjy salasynda da birqatar zańsyzdyqtar bar. Máselen, 46 mekeme eńbekaqy berý, eńbek demalysy men ózge de tólemderdi aýdarý barysynda zańsyzdyqqa jol bergen. Taǵy 23 mekeme kólemi 6,7 mln teńge bolatyn issapar shyǵyndaryn tóleý barysynda zań talaptaryn buzǵan.
Sońǵy jyldary oblys aýmaǵyndaǵy kóptegen áleýmettik nysandar kúrdeli jóndeýden ótip, halyq ıgiligine qyzmet etýde. Bul maqsatqa oblys bıýdjetinen jyl saıyn qomaqty qarjy bólinip keledi. Alaıda qyrýar qarjy jumsap, kúrdeli jóndeýden ótken keıbir mektepter búginde sol jumalǵan qarjyny aqtaı almaı otyr. Máselen, bir-eki jyl buryn jergilikti bıýdjetten bólingen 277 mln teńgege jóndeýden ótken Qostanaı aýdanyna qarasty Polovnıkov orta mektebinde sońǵy úsh jyl ishinde oqýshylar sany kúrt azaıyp ketken. 230 shákirtke shaqtalǵan atalmysh bilim oshaǵynda búginde nebary 76-aq bala oqıdy. Mektep shákirtteriniń oqý úlgerimi de máz emes. UBT nátıjeleri boıynsha aýdan mektepteriniń eń sońynda.
Sońǵy jyldary oblysta boı kótergen jańa oqý ǵımarattarynyń biri - Pertsev eldi mektebindegi orta mektep. Oǵan jumsalǵan qarjy kólemi - 635 mln teńge. Ókinishke, oraı búginde bul mektep te jartylaı bos tur. Sebebi aýylda mektep jasyndaǵy bala sany az. Qazir 150 balaǵa shaqtalǵan mektepte 70 shaqty shákirt bilim alyp jatyr. Bul jańadan salynatyn nemese kúrdeli jóndeýden ótetin mektep ǵımarattaryn anyqtaý barysynda muqııat júrgizilýi tıis taldaý-saralaý jumystarynyń shıkiligin kórsetedi dedi oblys basshysy. Aldaǵy ýaqytta tıisti organdar osy máseleler boıynsha ákimdikte jıyn ótkizedi.
