Qostanaıda 434 turǵyn úı órtendi - TJD
QOSTANAI. QazAqparat - Jyl basynan beri Qostanaı oblysynda 434 turǵyn úı sektory órtengen. Bul týraly oblys ákimdiginde ótken apparat májilisinde Tótenshe jaǵdaılar departamentiniń basshysy Talǵat Kákimov málimdedi, dep habarlaıdy QazAqparat.
Osy jyldyń qańtar aıynan bastap oblys aýmaǵynda 671 órt tirkelgen. Keı aımaqtarda byltyrǵy jylmen salystyrǵanda aıtarlyqtaı ósim baıqalady. Máselen, 2017 jyly Meńdiqara aýdanynda 10 órt faktisi tirkelse, bıyl bul kórsetkish 2,6 esege ósti. Búginge deıin Sarykól aýdanynda - 27, Naýyrzymda 18 órt oqıǵasy bolǵan.
«2018 jyly órtten jaraqat alǵan adamdar qatary artty. Byltyr 8 adam túrli jaraqattar alsa, bıyl 21 adam otqa kúıgen. Medıtsınalyq jaǵdaılarǵa baılanysty materıaldyq shyǵyn kólemi 33047 teńgeni qurady. Áýlıekól jáne Meńdiqara aýdanynda 4 adam órt kezinde kóz jumdy. Jalpy, ústimizdegi jyly 14 adam órtten qaza boldy»,- dedi oblystyq TJD basshysy Talǵat Kákimov.
Atalǵan vedomstvo málimetine súıensek, jyl basynan beri Qostanaı oblysynda 434 turǵyn úı sektory órtendi. Sondaı-aq,tilsiz jaýdyń kesirinen 104 avtokólikke zaqym keldi.
«Bizdiń departament mamandary oblystaǵy órttiń shyǵý sebepterin zerttedi. Qaıǵyly jaǵdaılar kóbine turǵyndardyń salǵyrttyǵynan bolady. 167 órt elektr qurylǵylarynyń aqaýlarynan boldy. 93 oqıǵa jylý peshterin durys qoldanbaý jaǵdaılarynda tirkeldi», - dedi vedomstvo basshysy.
Osy jyly 4 bilim berý mekemesinen órt shyqty. 16 saýda orny jáne óndiris oshaǵynan da órt shyqqan.
Departament basshysynyń aıtýynsha, jyl basynan beri halyq arasynda túsindirý jumystary júrgizilip keledi.
