Qostanaıda 418 myń gektar jerdiń ıesi joq
Turǵyndardy tolǵandyratyn máselelerdiń biri - jer qatynastary salasyndaǵy keleńsizdikter. Qazaqstannyń Eńbek Eri, «Qarqyn» sharýa qojalyǵynyń basshysy Saıran Buqanovtyń aıtýynsha, jeke turǵyn úı qurylysy maqsatynda tıimsiz paıdalanylyp jatqan jerler kóp. Bul máselede áli júıeli tártip ornaǵan joq.
«Búginde Jerdi paıdalaný jáne qorǵaý basqarmasy 418 myń gektar alqapta tekserý sharalaryn júrgizýde. Olardyń ıeleri tolyǵymen anyqtalmaǵan jáne jer úlesi týraly ashyq málimet joq. Tek osy jyly 155 myń gektar jerdi alý týraly sottyń talap-aryzdary shyqty. Sonyń 39 myń gektary ǵana májbúrli túrde alyndy», - dedi Saıran Buqanov.
Jerdi paıdalaný jáne qorǵaý basqarmasynyń tekserisinen keıin 2018 jyly Lomonosov aýyldyq okrýgindegi «Agro jer» JShS 16,7 myń ga jerdi zańsyz ıemdengeni belgili boldy.
«Rasymen de jer qatynastary men qurylys salasyndaǵy bıýrokratııalyq rásimder ózekti máselege aınalyp otyr. Muny Elbasy óziniń Joldaýynda basa aıtty. Qostanaıda turǵyndarǵa jerdi bólý protsesinde de áldebir suraqtar týyndaıdy. Sondyqtan bul máseleni jan-jaqty tekserý qajet. Jer salasyndaǵy qaǵazbastylyq azaıady dep úmittenemiz», - dep túsindirdi Saıran Buqanov.
Aıta keteıik, Nursultan Nazarbaev halyqqa arnalǵan Joldaýynda jer qory men jyljymaıtyn múlik týraly biryńǵaı aqparattyq baza jasaýdy tapsyrdy.
Sonymen qatar, jer qatynastary men qurylys salasyndaǵy bıýrokratııalyq rásimder ózekti máselege aınalǵanyn aıtty.
«Qarqyn» sharýa qojalyǵy basshysy Elbasy qoıǵan mindetterdiń aýqymdy ekenine toqtaldy. Sol sebepti oblystyq aýyl sharýashylyǵy basqarmasy tıisti mınıstrlikke usynys jasaýy kerek.
«Aldaǵy 5 jylda aýyl sharýashylyǵy tehnıkalaryn sýbsıdııalaýdy 25 paıyzdan 50 paıyzǵa deıin ulǵaıtý qajet. Sebebi, tehnıkalardyń, janar-jaǵarmaıdyń baǵasy aldyńǵy jyldarmen salystyrǵanda eki esege deıin ósip ketti. Kerisinshe, astyqty óz baǵasyna áreń ótkizemiz. Osy másele agroónerkásip keshenin tsıfrlandyrýdy iske asyrý kezinde taǵy bir qaralady dep senemiz», - dedi ol jıyn barysynda.
