Qostanaıda 400-ge jýyq ata-ana balalaryna ekpe jasatýdan bas tartqan
QOSTANAI. QazAqparat - Qaýipti juqpaly aýrýlar boıynsha Qostanaı oblysynda jaǵdaı turaqty. Bul týraly oblys ákimdiginde ótken apparat májilisinde aıtyldy, dep habarlaıdy QazAqparat tilshisi.
Qostanaı oblysy Qoǵamdyq densaýlyq saqtaý departamentiniń málimetinshe, juqpaly aýrýlardyń aldyn alý úshin qolǵa alynǵan vaktsınatsııalaý sharalary bıyl jaqsy nátıje berdi. Sonyń nátıjesinde byltyrǵy kezeńmen salystyrǵanda oblysta ótkir respıratorlyq juqpaly aýrýlarǵa shaldyqqandar qatary 21,1 paıyzǵa tómendegen. Buǵan qosa ózge de juqpaly indet boıynsha kórsetkish edáýir jaqsarǵan.
«Oblysta ekpe sharalary 21 ınfektsııalyq aýrýǵa qarsy júrgiziledi. Jyl basynan beri oblys turǵyndarynyń 42,6%-y ekpe jasatty. 2017 jyldy 96% kórsetkishpen aıaqtaǵan bolatynbyz. Sońǵy 5 aıda óńirde dıfterııa, kókjótel, polıamelıt, qyzylsha sııaqty aýrýlar tirkelgen joq. Vaktsınatsııamen qamtý deńgeıi joǵary. Epıdemıologııalyq kezeń basynan beri 61 myń adam tumaý juqtyrǵan. Onyń 73,3 paıyzy 14 jasqa deıingi balalardyń úlesinde. Osy aralyqta 81 myń adamǵa ekpe jasaldy», - dedi O. Bekmaǵambetov.
Basqarma basshysynyń sózinshe, keıbir azamattar ekpeniń densaýlyqqa zııany kóp dep oılaıdy. Máselen, byltyr 350 ata-ana balasyna ekpe jasatýdan bas tartqan. Olar ımmýndaý sharalaryna qaýippen qaraıdy. Keıbiri - túrli dinı aǵymdardy ustanǵandar.
Óz kezeginde oblys ákimi Arhımed Muhambetov orynbasary Marat Júndibaevqa dinı senimderi boıynsha ekpeden bas tartqandarmen jumys isteýdi tapsyrdy. Sondaı-aq, óńir basshysy osy jyly egeýquıryqtarmen kúresý sharalarynyń bastalatynyn aıtty.
«Jazdyń aptap ystyǵy endi biline bastaıdy. Sondyqtan ınfektsııalyq aýrýlardyń aldyn alý úshin keshendi sharalardy qolǵa alý kerek. Túrli aýrýlarǵa sebepshi bolatyn egeýquıryqtar men kórtyshqandardyń kóbeıetin kezeńi. Sol sebepti oblystyń barlyq qalasynda indet taratatyn kemirgishterge deratızatsııa júrgizilsin. Densaýlyq saqtaý departamenti muny qatań baqylaýǵa alsyn. Qajet bolyp jatsa, demalys kúnderi jumysqa shyǵyńyzdar. Aýrýdy emdegennen góri, aldyn alý áldeqaıda jeńil. Osyny umytpańyzdar», - dedi Arhımed Muhambetov.
Sonymen, oblysta egeýquıryqtarmen kúresýge 30-60 mln teńge qarajat bólinedi. Aımaq basshysy, óńirdiń epıdemıologııalyq jaǵdaıyn jaqsartyp, baqylaýdy kúsheıtýdi tapsyrdy.
