Qostanaıda 4 jasar bala besinshi qabattyń terezesinen qulady

QOSTANAI. QazAqparat – Qostanaıda tórt jasar bala besinshi qabat terezesinen qulady, dep habarlaıdy QazAqparat tilshisi.

Densaýlyq saqtaý basqarmasynyń málimetinshe, oqıǵa keshe keshke bolǵan.

«Bala 7-shaǵynaýdandaǵy kópqabatty úıdiń besinshi qabatynan qulady. 19.25-te habar tústi. Oqıǵa ornyna 19.28-de jedel járdem brıgadasy kelip jetti. Bala oblystyq balalar aýrýhanasyna jetkizildi», - dep habarlady oblystyq basqarmanyń baspasóz hatshysy Ksenııa Jylqybaeva.

Bala jabyq bas súıek-mı zaqymy, sonymen qatar sol jaqtaǵy toqpan jiliktiń jyljyp ketip synýy dıagnozymen tústi. Jumsaq ulpalaryna zaqym kelgen».

Ksenııa Jylqybaevanyń aıtýynsha, qazirgi kezde bala jansaqtaý bóliminde jatyr. Jaǵdaıy aýyr, biraq turaqty.

Basqarma deregine saı, jyldyń basynan beri 9 bala terezeden qulaǵan.

Sonyń ózinde, bul – oblystyq balalar aýrýhanasynyń jansaqtaý bóliminen ótip, aman qalǵandardyń sany.