Qostanaıda 39 eldi mekendi sý basýy múmkin
Oblystyq TJD bastyǵy Talǵat Kákimov tasqyn sýǵa qarsy jaǵdaıdy tolyq baqylaýda ustaý úshin arnaıy shtab qurylǵanyn aıtty. Qyzmetkerler oblystyń shalǵaı aýdandaryna jiberiledi. Buǵan qosa, sý tasqyny qaýpi bar gıdrotehnıkalyq qurylystardy baqylaý boıynsha kezekshilik uıymdastyryldy.
«Tasqyn sýdyń aldyn alý boıynsha tıisti is-sharalar júrgizilip jatyr. Bastapqyda 96 eldimeken sý basý qaýpi bar aýmaqtar sanatyna alynǵan. Alaıda, qazirgi ýaqytta naqty qaýip 39 eldimekenge tıip otyr. Qarǵyn sýdyń aldyn alý jáne joıý boıynsha jol kartasy jasaldy. Oǵan 442,8 mln teńge bólindi», - dedi departament bastyǵy.
Qostanaı qalasynyń aýmaǵynda, Drýjba aýylynyń Lýgovaıa, 70 let Oktıabrıa, Pıonerskaıa, Hákimjanov, 30 let Tselıny, Parkovaıa kósheleri, 2-Qostanaı aýdanyndaǵy Engels, Nekrasov, Týrgenev, Spartak, Krýpskaıa, Hımıkter, Solnechnaıa, Dostyq, Samal, Aqsý kósheleri, Krasnyı Kýznets, Pıonerskaıa, jas jaýynger kósheleri, sonymen birge Narıman bazary aýdanyndaǵy Tobyl kóshesine qar sýynan qaýip bar. Sondaı-aq, úıilip-jıylǵan qardy jappaı qala syrtyna shyǵarý tún mezgilderinde júzege asyrylady. Óıtkeni, kúndizgi álette tógindilerdi tysqa tasý jumystary, kóshelerde kólik qozǵalystarynyń kóp bolýyna baılanysty, shıraq ári sapaly júrmeýi múmkin deıdi mamandar. Qazirgi ýaqytta «Taza-Jol AT» JShS, «ABZ plıýs» JShS, «Vektor» JShS, «Ekol» JShS merdigerlik uıymdary bel jazbaı jumys isteýde. Jol tazalaý qyzmeti alǵashqy kezekte qoǵamdyq kólikter qozǵalysy tyǵyz, negizgi kóshe baǵyttaryn qardan arshydy.
«Qazgıdromet» RMK Qostanaı qalasy boıynsha fılıalynyń málimetinshe, búginde qar jamylǵysynyń ortasha mólsheri 21 sm-ge jetti. Bul jyldyq normadan 5%-ǵa artyq. Taıaý arada sý aıdyndarynda jarylys jumystary júrgizilmek. Azamattyq qorǵaý qyzmeti jasaqtalyp, qaýipsizdik beketteri ázirlenýde.