Qostanaıda 37 adam qar qursaýynan shyǵaryldy
QOSTANAI. QazAqparat - Qostanaı oblysynda táýlik ishinde qar qursaýynda qalyp qoıǵan 37 adamǵa kómek kórsetildi, dep habarlaıdy QazAqparat oblystyq TJD baspasóz qyzmetine silteme jasap.
«Arqalyq-Torǵaı tasjolynda, Ańǵar aýylynyń mańynda 2 avtokólik turyp qalǵan. Kólikterdiń ishinde 12 adam boldy. Olardyń ekeýi - balalar. Qutqarýshylar «Arqalyq-Jezqazǵan» jolynda 3 adamdy qaýipsiz jerge jetkizdi», - dep habarlady vedomstvonyń baspasóz qyzmeti.
Sondaı-aq, Taran aýdanynyń Elızavetınka aýylynda qalyń qarǵa batyp qalǵan 4 avtokólik TJD qyzmetkerlerin kómekke shaqyrdy. Kólikterdiń salonyndaǵy 9 adamǵa járdem kórsetildi.
Budan bólek, Naýyrzym aýdanynda 3 avtokólik qar qursaýynan shyǵaryldy. Oqıǵa «Qarameńdi-Óleńdi» tasjolynyń 12-shi shaqyrymynda bolǵan. Barlyǵy 9 adam evakýatsııalandy. Qutqarýshylar olardy Qarameńdi aýylyna jetkizdi.
