Qostanaıda 32 myńnan astam adam vırýstyq ınfektsııa juqtyrǵan
QOSTANAI. QazAqparat - Qostanaı oblysynda epıdemıologııalyq maýsym bastalǵannan beri 32 myńnan astam jedel respıratorlyq-vırýstyq ınfektsııasy (JRVI) tirkeldi, dep habarlaıdy QazAqparat.
Qostanaı oblysy qoǵamdyq densaýlyq saqtaý departamenti ınfektsııalyq jáne parazıttik aýrýlardy epıdemıologııalyq qadaǵalaý bóliminiń basshysy Gúlim Dosymova aıtqandaı, jyl basynan beri óńirde 31 adam tumaý juqtyrǵan.
«Qostanaı oblysynda epıdemıologııalyq maýsym bastalǵannan beri 32294 JRVI tirkeldi. Ótken jyldyń osy kezeńimen salystyrǵanda bul kórsetkish 11,1% - ǵa tómendegen. JRVI juqtyrǵandardyń 70,4%-y 14 jasqa deıingi balalar ekeni anyqtalyp otyr»,- dedi G. Dosymova.
Sonymen qatar, atalǵan vırýsty juqtyrǵandardyń 189-y - aıaǵy aýyr áıelder.
«Tumaýdy anyqtaý úshin 326 adamǵa PTsR ádisimen zertteý júrgizildi. 61 jaǵdaıda zertteý oń nátıjesin berdi. 48 adamda A (H1N1) tumaýynyń vırýsy, 8 naýqasta A (H3N2) tıpti vırýs tabyldy. Bir naýqasta A tıptes emes aýrý belgisi baıqaldy jáne 4 adam V tıpti tumaýdy juqtyrǵan. Aýyrǵan adamdardyń ishinen 15-i - 19 jasqa deıingi balalar, 42-si - eresekter, onyń ishinde tumaýǵa qarsy egilmegen júkti áıelder de bar»,- dedi bólim basshysy.
Aıta keterligi, tumaý aýrýynyń barlyq jaǵdaılary Qostanaı jáne Rýdnyı qalalarynda tirkelgen.
Buǵan deıin habarlaǵanymyzdaı, oblystyq Qoǵamdyq densaýlyq saqtaý departamenti ónimderdiń qaýipsizdigin qamtamasyz etý maqsatynda dúkenderdegi taýarlardyń tehnıkalyq reglamentterge sáıkestigine monıtorıng júrgizdi.
