Qostanaıda 32 memlekettik qyzmetshi mas kúıinde kólik júrgizgen

QOSTANAI. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti ádep jóninde keńes ótkizdi, dep habarlaıdy QazAqparat.

Jıynda memlekettik qyzmetshilerdiń quqyq buzý monıtorınginiń qorytyndysy talqylandy. Atalmysh monıtorıngke 6 myń memlekettik qyzmetshi qatystyrylǵan.

«Monıtorıng qorytyndysy boıynsha 382 memlekettik qyzmetkerdiń ákimshilik quqyq buzýshylyq jasaǵany belgili boldy. Olar 529 ret ákimshilik tártipti buzǵan. Barlyq zańbuzýshylyqtyń 59% - kólik jáne jol sharýashylyǵyndaǵy ákimshilik quqyq buzýshylyqtar, 41% - basqa da tártip buzý faktileri», - delingen vedomstvo taratqan aqparattyq habarlamada.

Monıtorıng qorytyndysyna úńilsek, ákimshilik zań buzý derekteriniń basym bóligi Qostanaı aýdanynda (31) jasalǵan. Sonymen qatar Áýlıekól aýdanynda - 21, Qostanaı qalasynda 20 fakt tirkeldi. 32 memlekettik qyzmetshi mas kúıinde kólik júrgizgeni úshin ákimshilik jaýapkershilikke tartyldy.

«Osy jyly 3 memlekettik qyzmetshi ishki ister organdary (polıtsııa) qyzmetkeriniń talaptaryn oryndamaý boıynsha ákimshilik jaýapkershilikke tartyldy. Ákimshilik quqyq buzýshylyq jasaǵany úshin alkogoldik ishimdikter ishý nemese qoǵamdyq oryndarda masań kúıde bolǵany úshin 3 memlekettik qyzmetshi ákimshilik jaýapkershilikke tartyldy»,- dep málimet taratty agenttiktegiler.

Jalpy, Qostanaı oblysynyń memlekettik qyzmetshilerine ákimshilik quqyq buzýshylyq jasaǵany úshin jalpy somasy 10,4 mıllıon teńgege ákimshilik aıyppul salyndy.