Qostanaıda 300-ge jýyq dáriger jetispeıdi
QOSTANAI. QazAqparat - Qostanaı oblysynyń aýyldarynda ámbebap dárigerler jetispeıdi, al qalalarda salalyq mamandar tapshy. Bul týraly QazAqparat tilshisine oblystyq densaýlyq saqtaý basqarmasynyń basshysy Erkin Dáýitbaev aıtty.
Byltyr Tobyl-Torǵaı óńirine 105 jas maman jáne 16 tájirıbeli dáriger kelgen. Olardyń arasynda onkologtar, bala dárigerleri, terapevt jáne hırýrgııa salasynyń mamandary bar. Biraq, bul oblystaǵy kadr máselesin tolyq sheshe almady.
«Jergilikti bılik qalada jumys isteýge kelgen jas mamandarǵa 500 myń teńgeden, aýyldyq jerlerge at basyn burǵysy kelgenderge 2,5 mln teńgege deıin kóterme aqy usynady. Onyń syrtynda, olar eńbekaqysyna qosymsha yntalandyrý komponentterine ıe bolady. Alaıda, osyndaı múmkindikterge qaramastan, medıtsına kadrlarynyń jetispeýshiligi áli seziledi. Qalalar salalyq mamandar qataryn tolyqtyra almaı otyrsa, aýyldarǵa birinshi kezekte terapevtiler jáne ámbebap dárigerler qajet», - deıdi Dáýitbaev.
Basqarmasynyń basshysynyń aıtýynsha, dárigerler tapshylyǵyn joıý úshin júıeli jumystar júrgizilýde. Mysaly, jas mamandardy tartý maqsatynda Batys Qazaqstannyń medıtsınalyq ýnıversıtetimen kelisim jasalǵan. Buǵan qosa memlekettik-jekeshelik áriptestik aıasynda Rýdnyı jáne Zatobol kentinde 250 orynǵa shaqtalǵan emhana salý josparlanǵan.
«Biz jergilikti bıýdjet esebinen 100 dárigerdi salalyq mamandyqtar boıynsha oqyta alamyz. Munan soń olar Qostanaı aımaqtarynda bes jyl jumys isteıdi. Biz qazir rezıdentterge 80 grant bólemiz jáne dáriger mamandyǵyn tańdaǵan jastarǵa taǵy 20 grant úlestiriledi. Olardyń ýnıversıtettegi oqýlarynyń aqysyn tóleımiz», - dedi basqarma basshysy.
Basqarma aqparatyna súıensek, oblysta barlyǵy 300-ge jýyq dáriger jetispeıdi. Sonyń kesirinen týberkýlez, ana men bala ólimi, qan aınalý júıesi, qaterli isik aýrýlar boıynsha Qostanaı oblysy táýir kórsetkishke qol jetkize almaı keledi.
