Qostanaıda 3 myńnan astam adam turaqty jumysqa ornalasty
QOSTANAI. QazAqparat - Byltyr Qostanaıda «Nátıjeli jumyspen qamtý jáne jappaı kásipkerlikti damytý» memlekettik baǵdarlamasy aıasynda 3 myńnan astam adam turaqty jumysqa ornalasty, dep habarlaıdy QazAqparat tilshisi.
Atalǵan baǵdarlamanyń eldi eńbekpen qamtýda jospary aýqymdy. Oblystyq jumyspen qamtý ortalyǵynyń mamany Qarlyǵash Jarasovanyń aıtýynsha, jumys izdep kelgen adamdarǵa oqý kýrstarynan ótý usynylady.
«Oqytý óńirdiń 7 kolledji men 2 oqý ortalyǵynda ótkiziledi. Oqý uzaqtyǵy úsh aıǵa deıin sozylady. Olarǵa aı saıyn 16750 teńge stıpendııa tólendi. Qostanaı qalalyq jumyspen qamtý ortalyǵy arqyly byltyr 4341 adam eńbekke aralasty. Onyń 3 myńnan astamy turaqty jumyspen qamtyldy. 256 adam áleýmettik eńbek oryndaryna jiberilse, jastar tájirıbesi boıynsha 167 adam eńbekaqysyn aıyryp otyr. Qoǵamdyq jumys oryndaryna 221 adam tartyldy. Baǵdarlamanyń birinshi baǵyty sheńberinde 288 azamat eńbek naryǵynda suranysy joǵary mamandyqtarǵa oqyp shyqty», - deıdi ol.
Baǵdarlama aıasynda kásipkerlikti damytýǵa basymdy berilgen. Osy maqsatta oblysta qosymsha 415 mln teńge bólindi. Nátıjesinde, byltyr 28 adam jeke isin ashyp, nesibesin molaıtyp otyr.
Buǵan qosa, Qostanaıǵa Almaty, Qyzylorda, Mańǵystaý, Túrkistan, Jambyl oblystarynan byltyr 45 otbasy kóship keldi. Solardyń arasynan 58 adam jumysqa ornalasty, 5 adam jeke kásibin ashty. Baǵdarlama qatysýshylarynyń bárine memleket tarapynan tıisti áleýmettik járdem usynyldy.
