Qostanaıda 3 mlrd teńge sýbsıdııa jymqyrý isi boıynsha úkim shyqty

ASTANA. KAZINFORM – Qostanaı qalasynda memlekettik sýbsıdııalardy jymqyrý jáne qylmystyq jolmen alynǵan kiristerdi zańdastyrý faktisi boıynsha úkim shyǵaryldy. 

Tergeýdi Qostanaı oblysy boıynsha Qarjylyq monıtorıng agenttiginiń departamenti júrgizdi.

Eske sala keteıik, «Beef Export Group» JShS basshysy Parhomenko jetekshilik etken qylmystyq top Aýyl sharýashylyǵy basqarmasynyń laýazymdy tulǵalarynyń qatysýymen, sondaı-aq aýdandyq deńgeıdegi aýyl sharýashylyǵy taýar óndirýshileri men veterınarııalyq mamandarmen kelisý arqyly sýbsıdııalardy zańsyz alý shemasyn uıymdastyrǵan.

— Qaskóıler iri qara maldy satyp alý jáne ony qaıta óńdeý týraly qujattardy jalǵan rásimdeý arqyly agroónerkásiptik keshendi damytýǵa arnalǵan memlekettik baǵdarlama aıasynda júıeli túrde sýbsıdııa alyp otyrǵan.

Túsken qarajattar jalǵan jetkizilgen mal úshin tólengendeı kórsetilip, aqparattyq júıelerge engizilgennen keıin qolma-qol aqshaǵa aınaldyrylyp, keıin jalǵan ónim úshin tólem retinde baqylaýdaǵy uıymdardyń shottaryna qaıta aýdarylǵan.

Іske zańdy túr berý maqsatynda jalǵan býhgalterlik qujattar rásimdelip, olardyń negizinde sýbsıdııa alýǵa qaıta ótinimder berilip otyrǵan, — delingen QMA habarlamasynda.

Saldarynan memleketke 3 mlrd teńgeden astam zalal keltirildi.

Tergeý barysynda kúdiktiler 107 mln teńgeden astam qarajatty erikti túrde ótedi.

Aıta ketý kerek, mundaı qylmystar agrarlyq sektordy memlekettik qoldaý júıesine degen senimdi álsiretip, adal kásipkerlerdiń aýyl sharýashylyǵyn damytý múmkindikterin shekteıdi.

Sot úkimimen uıymdastyrýshy Parhomenko A.G. 14 jylǵa bas bostandyǵynan aıyryldy.

Qylmystyq toptyń 14 qatysýshysyna 6 jyldan 10 jylǵa deıin bas bostandyǵynan aıyrý jazasy taǵaıyndaldy.

Sonymen qatar, jalpy quny 3 mlrd teńge bolatyn múlik, onyń ishinde 1,3 mln AQSh dollary jáne 700 mln teńge tárkilendi.

Úkim zańdy kúshine engen joq.