Qostanaıda 3,4 mln gektar alqapqa bıdaı egiledi
QOSTANAI. QazAqparat - Bıyl Qostanaıda arpa egiletin alqap 32 myń gektarǵa ulǵaıdy. Bul týraly kóktemgi egis naýqanyna ázirlik máseleleri boıynsha ótken agrokeńeste málim etildi, dep habarlaıdy QazAqparat tilshisi.
Óńirde kóktemgi egis jumystaryn ótkizýge ázirlik jumystary bastaldy. Qostanaı oblysy ákiminiń orynbasary Ǵaýez Nurmuhambetovtiń aıtýynsha, bıyl barlyǵy 5 mln 228,9 myń gektar alqapqa dán sińiriledi. Onyń 3 mln 487 myń gektary bıdaıdyń úlesinde. Bıyl arpa egiletin alqap 32 myń gektarǵa ulǵaıyp, 337 myń gektarǵa jetti. Dándi-burshaqty daqyldar 32 myń, al qaraqumyq alqaby 1,4 myń gektarǵa artty.
Aıta keteıik, bıyl ónimdilikti joǵarylatý úshin sharýalarǵa mıneraldy tyńaıtqyshtar satyp alýǵa sýbsıdııa bólindi.
«Dala jumystaryna barlyǵy 24 myńǵa tarta traktor, 840 egin sebetin komplekster, 1 myń búrikkish, 20 myń tuqym sepkish qatystyrylady. Naýqandyq jumystarǵa tehnıkalar daıyn. Tek, Naýyrzym, Fedorov, Taran sııaqty jekelegen aýdandarda tehnıka ázirligi 88%. 15-sáýirge deıin barlyq tehnıka sapta turýy tıis. Bıylǵy jyly sharýalar 22 myń tonna mıneraldy tyńaıtqysh satyp alýy tıis. Qazirdiń ózinede 12,5 myń tonna tyńaıtqysh alýǵa kelisimshart jasaldy. Onyń ishinde 5,9 myń tonna taýardyń quny tólendi. Bul maqsatqa 1 mlrd 177 mln teńge sýbsıdııa bólindi», - dedi Ǵ.Nurmuhambetov.
Qajetti suıyq otyn máselesi de sheshimin tapqan. Kóktemgi dala jumystaryn ótkizýge barlyǵy 71 myń tonna dızeldik otyn qajet. Ázirge oblys termınaldarynda 10 myń tonna dızel otyny bar. Bıyl onyń baǵasy 1 lıtrge 151 teńge dep belgilendi. Keńeste aýdan, qala ákimderine sharýashylyqtardyń janar-jaǵarmaımen der kezinde qamtylýy úshin baqylaý jasaý qajettigi mindetteldi.
Bıyl óńirde qar jyldaǵydan az tústi. Dıqandar osyǵan alańdap otyr. Sondyqtan, kún tártibindegi basty másele - qoldaǵy bar múmkindikti paıdalanyp, tıisti ylǵal qoryn jaýyp úlgerý qajet. Basqosýda ǵylymı-tájirıbelik ortalyq mamandary óz tujyrymdaryn ortaǵa saldy.
«Basqa jyldarmen salystyrǵanda bıyl ylǵal óte tómen. Árıne sonshama túńilip ketetindeı jaǵdaıda emes. Endigi mindet - aýa-raıynyń qolaısyzdyǵyna qaramastan, jyldaǵy mejeden kem túspeý. Sol sebepti aldaǵy egiske jaqsy daıyndalyp, astyq egý tehnologııasynan qate jibermegen jón. Tehnıka jaǵy saı bolsa jyldaǵydaı ónim ala alamyz degen úmittemiz», - deıdi Qostanaı aýyl sharýashylyǵy zertteý ınstıtýtynyń bas dırektory Nábıdolla Kıkebaev.
Foto: on-desktop.com
