Qostanaıda 25 mektep jóndeýden ótti – ákimdik

QOSTANAI. QazAqparat – Qostanaı oblysynyń ákimi Arhımed Muhambetov Qostanaı qalasynyń bilim berý obektilerin aralap, 2020 jylǵy kúrdeli jóndeý jumysynyń qorytyndysymen tanysty, dep habarlaıdy QazAqparat oblys ákiminiń baspasóz qyzmetine silteme jasap.

2020 jyly Qostanaıda 25 bilim berý nysany jóndeýden ótken. Bul maqsatta 3,5 mlrd teńge jumsaldy, onyń ishinde 3,1 mlrd teńgege 7 kúrdeli jóndeý júrgizildi. Nátıjesinde bilim berý salasyndaǵy 1,7 myńǵa jýyq qyzmetkerdiń eńbek jaǵdaıy jaqsarǵan.

Oblys basshysy barǵan nysan – Qostanaıdaǵy №17 orta mektep. 1 480 oqýshy bilim alatyn mekteptegi ashana, sport jáne májilis zaldary, kitaphana tolyǵymen jóndelip, zamanaýı jabdyqtarmen qamtamasyz etildi. Al oqý kabınetterine arnaıy qurylǵylar ákelindi.

3-shi toqsanda oblys mektepterinde 1-5 synyptardyń 32 kezekshi toby oqıdy, al 9 jáne 11-synyp oqýshylary aralas formatta oqýǵa kirisken. Qalǵandarynda qashyqtan oqytý uıymdastyryldy.

«Mektep jóndelip, balalarymyzǵa sapaly jaǵdaılar jasalǵany óte mańyzdy, kabınetterde ınteraktıvti jabdyqtar men jańa jıhazdar paıda boldy, bul oqýshylardy tártipke shaqyryp, qajetti zattardy uqypty ustaýǵa úıretedi. Qazir birinshi synyp oqýshylary kezekshi toptyń sabaqtaryn asyǵa kútedi» - dep atap ótti bastaýysh synyp muǵalimi Roza Zeınekına.

Arhımed Muhambetov oblystyq bilim basqarmasynyń basshysyna mektepterdi jóndeýden ótkizýdiń josparyn júıelep, keshendi túrde qolǵa alýdy tapsyrdy.