Qostanaıda 21 myń adam qant dıabetimen aýyrady
QOSTANAI. QazAqparat - Búginde Qostanaı oblysynda 21 myńnan artyq adam qant dıabetimen aýyrady. Bul týraly qaladaǵy №4 emhanada ótken jıynda málim etildi, dep habarlaıdy QazAqparat tilshisi.
Dárigerlerdiń deregine sáıkes, álemde 422 mln, Qazaqstanda 308 myń adam qant dıabetine shaldyqqan.
«Qant dıabeti aýrýy barlyq zat almasý úderisteriniń buzylýyna ákeledi, qan tamyrlaryn, júıke júıesin, basqa da júıeler men aǵza múshelerin zaqymdaıdy. Insýlınge táýeldi dıabet kóbine balalar men jastarda kezdesedi. Ekinshi túrin ınsýlınge táýelsiz dıabet dep ataýǵa bolady. Bul 40 jastan asqandarda jáne artyq salmaǵy bar adamdarda bolady», - deıdi endokrınolog Gúlnár Moldahmetova.
Aq halattylardyń aıtýynsha, turǵyndardyń kóbi osy syrqattyń qanshalyqty qaýipti ekenin bilmeıdi. Qannyń quramyndaǵy qanttyń joǵary mólsheri barlyq júrek qan tamyrlary, ınsýlt, ınfarkt aýrýlarynyń paıda bolýyna ákeledi. Tipti, bul derttiń alǵashqy belgilerin anyqtaýdyń ózi qıyn.
«Epıdemııaǵa aınalǵan aýrýdyń aldyn alý úshin emdeý mekemelerinde kóptegen is - sharalar júrgiziledi. 2011 jyldan beri skrınıgtik tekserister iske asyrylýda. Emhanalardyń janynan ashylǵan densaýlyq mektepterinde dáris sabaqtary ótkizilip júr. Degenmen, qostanaılyqtar aty atalǵan aýrý jaıynda aqparat alýǵa asyǵys emes. Udaıy ótetin semınarlarǵa qatysý belsendigi tómen», - deıdi dárigerler.
