Qostanaıda 20 myń oqýshy ólketaný ekspedıtsııalaryna shyǵady
Bıyl Qostanaıda 12 demalys lageri jumys isteıtin bolsa, onyń ekeýi -jekemenshik ıeliginde. Budan ózge, mektep janynan shatyrly lagerler óz jumysyn bastaıdy. Oblystyq Bilim basqarmasynyń basshysy Vasılıı Tsymbalıýktiń málimetinshe, jazǵy demalyspen oqýshylardyń 90 paıyzy qamtylady. Qalalar men aýdandar ákimdikteri halyqtyń áleýmettik osal sanattaryna jatqyzylǵan 12 myńnan astam balany saýyqtyrý legerlerine tegin jibermek.
«Demalys lagerinde kúnine 1 balaǵa 2082 teńge jumsalady. Bul maqsatta barlyǵy 65,8 mln teńge bólingen. Sondaı-aq, balalardyń jazǵy demalysyn uıymdastyrýdy qarjylandyrý máselesi sheshilip keledi. Bes lagerge jóndeý jumystary qajet. Qostanaı aýdany, Jankeldın, Denısov, Áýlıekól aýdandary men Lısakov qalasyndaǵy «Alyı parýs» balalardy saýyqtyrý ortalyqtarynyń materıaldyq-tehnıkalyq bazasyn nyǵaıtý úshin jergilikti bıýdjetten qarajat surattyq. Oblystyń demalys lagerlerin jóndeý jumystaryn oryndaýǵa jáne materıaldyq-tehnıkalyq bazasyn nyǵaıtýǵa aýdan jáne qala ákimdikterinen 57 mln teńgeden astam qarajat tústi», - dedi basqarma basshysy.
Oqýshylardyń jazǵy demalysyn tıimdi ótkizý boıynsha bilim basqarmasy keshendi jobalar jasaǵan. «Rýhanı jańǵyrý» baǵdarlamasy men Elbasynyń «Uly dalanyń jeti qyry» maqalasyn júzege asyrý aıasynda týrıstik-ólketaný jumystaryn damytýǵa erekshe kóńil bólinbek.
«20 myńnan astam oqýshy ólketaný ekspedıtsııalary quramyna alynyp, oblystyń kıeli oryndaryn aralaıdy. Sondaı-aq, óńir aýmaǵynda 2 myńnan astam shyǵarmashylyq jáne sport úıirmeleri jumys isteıdi. Buǵan 34 myń oqýshy qatysady. Jaz mezgilinde Qostanaı oblysy jergilikti polıtsııa qyzmetiniń 300 qyzmetkeri balalardyń demalys oryndaryn qadaǵalaıdy. Sonymen qatar, kámeletke tolmaǵandardyń sýıtsıdtik kórinisteriniń aldyn alý maqsatynda árbir óńir psıhologııalyq qoldaý ortalyqtarymen birlesip jumys josparyn ázirleýi tıis. Bilim berý organdary bul jumysty turaqty baqylaýda ustaıdy»,- dedi Vasılıı Tsymbalıýk.
Oblys ákimi Arhımed Muhambetov jazǵy demalys kezeńinde vedomstvoaralyq is-sharalar josparyn tolyǵymen oryndaýdy tapsyrdy. Sondaı-aq, Qostanaı oblysynda balalar men jasóspirimderdiń demalysyn, jumyspen qamtylýyn uıymdastyrý aýdan-qala ákimdikterine júkteldi.
