Qostanaıda 20-ǵa jýyq memlekettik qyzmetkerdiń jalaqylaryna ústemeaqy qosylmaǵan

QOSTANAI. KAZINFORM — Zań buzýshylyqtardy Memlekettik qyzmet isteri agenttiginiń departament qyzmetkerleri anyqtady, dep habarlaıdy Kazinform menshikti tilshisi.

Qostanaı oblysynda aýdandardyń jergilikti atqarýshy organdary memlekettik qyzmetkerlerdi laýazymǵa taǵaıyndalǵannan keıin baǵalaý protsedýrasyn júrgizbeı, jalaqylaryna ústemeaqy tóleýden aıyrdy.

Olar qyzmetkerlerdiń quqyqtary eskerilmegen barlyǵy 20 jaǵdaıdy anyqtady. Zardap shekkenderdiń arasynda Denısov aýdany ákimdiginiń memlekettik qyzmetkeri de bar. Ol laýazymyna sáýir aıynda kiristi jáne talap etiletin merzimde qajetti baǵalaýdan óte almady. Sondaı-aq mundaı zań buzýshylyqtar Amangeldi, Áýlıekól, Jangeldi jáne Qarabalyq aýdandarynyń jergilikti atqarýshy organdarynda tirkeldi.

— Baǵalaý memlekettik qyzmetshilerdiń bonýstaryna, mansaptyq ósýine áser etedi. Memlekettik qyzmetshiniń belgili bir laýazymdaǵy ókilettik merzimi bir aıdan az bolsa nemese qyzmetker eńbek nemese áleýmettik demalysta, eńbekke ýaqytsha jaramsyz, issapar, taǵylymdama, qaıta daıarlaý nemese biliktiligin arttyrýda bolsa, ony zań boıynsha júzege asyrýǵa bolmaıdy — dep atap ótti departamentte.

Qazirgi kezde barlyq 20 qyzmetkerdiń quqyǵy qalpyna keltirilip, baǵalaý protsesine engizilgen. Sonymen qatar, olarǵa eki mıllıon teńgeden astam ústemaqy tóleý qarastyrylǵan.

Osyǵan deıin Qostanaı oblysynda memlekettik shekarany zańsyz kesip ótpek bolǵan sheteldikter ustalǵanyn jazdyq.