Qostanaıda 2 jylǵa sottalǵan áskerı qyzmetker jazadan bosatyldy
QOSTANAI. QazAqparat - QR Áskerı sotynyń alqasy QR Ulttyq gvardııasynyń 6697 áskerı bólimshesi komandıriniń orynbasary, maıor Esbolat Tólegenovke qatysty úkimdi qaıta qarady, dep habarlaıdy «QazAqparat» HAA tilshisi.
Belgili bolǵandaı, 2017 jyldyń tamyz aıynda maıor Tólegenov avtomobıl vzvodynyń júrgizýshisi, serjant Nıkolaı Karpenkoǵa symy oqshaýlanbaǵan áýe elektr jelisiniń astyndaǵy shatyrǵa jóndeý jumystaryn júrgizýge buıryq bergen. Osylaısha, Karpenkony toq soǵyp, es-túsinen aıyrylǵan. Dene jaraqattaryn alǵan ol qalalyq aýrýhanaǵa jetkizilgen. Áskerı qyzmetkerge «Elektr jaraqaty. Klınıkalyq ólimnen keıingi kúıde (koma), betin, sol jaq bilegin, arqasy men taban býyndaryn elektr kúıigi shalǵan» degen dıagnoz qoıyldy.
2017 jylǵy 15 qarashada Qostanaı garnızonynyń áskerı soty Esbolat Tólegenovti qyzmetine salǵyrt qaraǵany úshin eki jylǵa shartty túrde bas bostandyǵynan aıyrdy.
Alaıda, sottalýshy óz kinásin moıyndamaı, serjantqa mundaı buıryq bergenin joqqa shyǵardy. Appelıatsııalyq shaǵym túsirip, sot úkimin qaıta qaraýdy talap etken. Buǵan qosa serjant Nıkolaı Karpenko komandır orynbasarynyń buıryq bermegenin rastaǵan.
Nátıjesinde, QR Áskerı sotynyń alqasy qylmystyq isti qaıta qarap, sottalýshynyń áreketinde qylmystyq quqyq buzýshylyq quramynyń bolmaýyna oraı aqtaý úkimin shyǵardy.
