Qostanaıda 2 myńnan astam turǵyn úıdi sý basý qaýpi bar
QOSTANAI. QazAqparat - Bıyl Qostanaı oblysynda tótenshe jaǵdaılardyń aldyn alý jáne joıý úshin 461 mln teńge bólindi, dep habarlaıdy QazAqparat tobyl-torgai.kz saıtyna silteme jasap.
Oblystyq TJD bastyǵy Talǵat Kákimov tasqyn sýǵa qarsy jaǵdaıdy tolyq baqylaýda ustaý úshin arnaıy top qurylǵanyn aıtty. Qyzmetkerler Arqalyq qalasyndaǵy Úshtóbe, Ashýtasty, Aqjar ózenderiniń ańǵaryn jáne qar sýy jınalatyn saılardy qarap, tekserip shyqty. Qaratorǵaı, Sarytorǵaı, Saba ózenderine jaqyn ornalasqan eldi mekenderde jyl saıyn sý tasqyny bolatyn. Bıyl ondaı qaýip joq dep otyr qutqarýshylar. Amankeldi aýdanyna qarasty Amantoǵaı, Úrpek, Qarasý aýylynyń mańyndaǵy Jaldama jáne Torǵaı ózenderi de arnadan aspaýy tıis.
«Qostanaı qalasynda shamamen 8 myń turǵyny bar eki myńnan astam turǵyn úıdi qar sýy basýy múmkin. Jergilikti atqarýshy organdarmen birlese sý basýy múmkin alqaptardaǵy osal ýchaskeler anyqtalyp, turaqty baqylaýda tur. Oblystyq densaýlyq saqtaý basqarmasy sý basý qaýpi bar aımaqta turatyn júkti áıelderdi esepke aldy. Sý basý aımaǵynan evakýatsııalanǵan azamattardy ýaqytsha ornalastyrýǵa 152 nysandy daıyndap otyrmyz. Onyń ishinde jataqhana, qonaq úı, bilim nysandary bar. 30 shatyr men 32 kıiz úı de daıyn. Odan basqa 3 myń 248 kereýet, 6 myń 67 tósek oryn jıyntyǵy jáne 5 myń 798 tonna azyq-túlik qarastyryldy», - deıdi Talǵat Kákimov.
Tasqyn sýǵa qarsy qımylǵa Qostanaıda 2 262 adam jáne 826 tehnıka tartylady. Sý basýy múmkin aımaqtarda 488 ınjenerlik tehnıka, 221 júk kóligi, 137 avtobýs, 83 júzý quraly, 245 sýdy sorǵytyp alatyn arnaıy tehnıka daıyn tur.
«Qazgıdromet» oblystyq fılıalynyń dırektory Larısa Kýzmınanyń málimetinshe, oblysta qystaı jaýǵan qardaǵy sý qory byltyrǵynyń 40% ǵana quraıdy eken. Al sý qoımalaryndaǵy sý onyń 68% toltyryp tur, 449 mln tekshe metr sý sııatyn oryn bar. Alaıda, sý tasqyny ylǵı qardyń kóptiginen bola bermeıdi. Sý ótkizgeshterdiń bitelip qalýynan keptelgen sý oıdaǵy aýyldardy basatyn.
