Qostanaıda 2 myńnan astam dárigerge ústemeaqy tólendi
Elimizde koronovırýs ınfektsııasymen kúresýge jumyldyrylǵan 100 myńnan astam medıtsına qyzmetkerine ústemeaqy tólendi. Bul úshin respýblıkalyq bıýdjetten Medıtsınalyq saqtandyrý qoryna 35 mlrd 700 mln teńge bólindi. Al Qostanaı oblysynyń aqhalattylaryna 2 mlrd teńgege jýyq ústemeaqy tólendi.
Medıtsınalyq saqtandyrý qory qaýipti jaǵdaıda jumys isteıtin dárigerler men medıtsına qyzmetkerleriniń sany aı saıyn artyp kele jatqanyn habarlady. Eger naýryz aıynda ústemeaqyny 19 myńnan astam qyzmetker alsa, mamyr aıynda olardyń sany 40 myń adamǵa deıin ósti. Qostanaı oblysynda maýsym aıy úshin 2000-ǵa jýyq dáriger ótemaqy aldy. Qazir olardyń qatary artty. Ótemaqyǵa ıe bolǵan dárigerlerdiń 366-sy birinshi dárejeli táýekel tobyna, 749-y ekinshi, 759-y úshinshi dárejeli táýekel tobyna jatady.
«2020 jyly koronavırýstyq ınfektsııanyń aldyn alýǵa, dıagnostıkalaýǵa jáne emdeýge, sondaı-aq epıdemııaǵa qarsy is-sharalarǵa qatysqany úshin medıtsına qyzmetkerlerine ústemeaqy tóleýge 10,9 mlrd teńge bólindi. Búginde onyń 5,5 mlrd teńgesi ıgerildi. Oblystyń medıtsınalyq uıymdaryn qarjylandyrý úshin 2021 jyly 62,9 mlrd teńge baǵyttalady», - deıdi «Áleýmettik medıtsınalyq saqtandyrý qory» KEAQ Qostanaı oblysy boıynsha fılıalynyń dırektory Sáýle Aımuhambetova.
Oblysta koronavırýstyq ınfektsııanyń aldyn alýǵa jáne emdeýge tikeleı qatysqan dárigerlerdi qoldaý jalǵasýda. Buǵan deıin 1,5 mln teńge kólemindegi kóterme aqy tek aýylǵa baratyn dárigerlerge ǵana berilip kelse, bıyldan bastap qalalardaǵy medıtsınalyq mekemelerge jumys isteýge kelgen mamandarǵa da 1 mln teńgeden qoldaý kórsetiledi.
Medıtsına kadrlaryn turǵyn úımen qamtamasyz etý boıynsha jumystar belsendi júrgizilýde. Osy jyly medıtsınalyq qyzmetkerler úshin «Qazaqstan ıpotekalyq kompanııasy» AQ-nan 100 páter satyp alynady. Budan bólek 640 páterlik jalǵa beriletin úılerdiń qurylysy júrgizilýde, olardyń negizgi bóligi medıtsına qyzmetkerleri arasynda bólinetin bolady.
