Qostanaıda 19 tártip saqshysy paramen ustaldy
QOSTANAI. QazAqparat - Qostanaı oblysynda óz laýazymyn asyra paıdalanyp, para alý máseleleri jol kólik oqıǵalarynda jıi kezdesedi. Bul týraly memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti basshysy Erlan Salyqbaev málim etti, dep habarlaıdy QazAqparat tilshisi.
Elimizdegi memlekettik saıasattyń basty baǵyttarynyń biri - jemqorlyqpen kúres. Osy taqyryp boıynsha ótken búgingi jıynǵa memlekettik qyzmettegi laýazymdy tulǵalar men ishki ister bólimderiniń qyzmetkerleri qatysty.
«Bizdiń departament mamandary ár toqsan saıyn halyq arasynda monıtorıng júrgizedi. Qolda bar derekterge súıensek, búginderi ishki ister bólimi qyzmetkerleri arasynda jemqorlyq faktileri kóp kezdesedi», - dedi Erlan Salyqbaev.
Jıynda aıtylǵandaı, jyl basynan beri para alǵan 19 tártip saqshysy jaýapqa tartylǵan. Onyń 15-niń isi sotta qaralyp, 8-i bas bostandyǵynan aıyryldy.
Degenmen, jergilikti turǵyndar arasynda júrgizilgen monıtorıng óńirdegi jemqorlyq faktisiniń ótken jylmen salystyrǵanda 36 paıyzǵa azaıǵanyn kórsetip otyr. Qoǵam dertiniń aldyn alý maqsatynda uıymdastyrylǵan osyndaı sharalar oń nátıje berýi tıis deıdi departament basshysy.
