Qostanaıda 18 shetel azamaty adam saýdasynyń qurbany bolǵan
QOSTANAI. QazAqparat - Qostanaı oblysy ІІD uıymdasqan qylmysqa qarsy kúres basqarmasynyń qyzmetkerleri shetel azamattarynyń eńbegin zańsyz paıdalanǵan kásipkerdi qamaýǵa aldy, dep habarlaıdy QazAqparat tilshisi oblystyq ІІD baspasóz qyzmetine silteme jasap.
Jedel-izdestirý is-sharalary barysynda polıtseıler jeke kásipkerdiń qol astynda 18 shetel azamatynyń sáýir aıynan bastap jumys istep jatqanyn anyqtady. Keıin belgili bolǵandaı, kásipker olardy qorqytyp ustap, aýyr jumystarǵa salǵan.
«36 jastaǵy Qaraǵandy qalasynyń turǵyny Ózbekstan azamattarynyń eńbegin zańsyz paıdalanǵan. Jábirlenýshilerdiń qashyp ketýge múmkindigi bolmady. Sebebi, aıyptalýshy olardyń jeke qujattaryn tartyp alǵan. Osy ýaqyt aralyǵynda Ózbekstan azamattaryna eńbekaqy bermeı kelgen. Bul fakt boıynsha QR QK 128-baby, 2-bólimimen («Adam saýdasy») sotqa deıingi tergeý amaldary bastaldy», - delingen ІІD baspasóz habarlamasynda.
Kásipkerdiń qylmysy áshkere bolsa, ol 5 jyldan 7 jylǵa deıin bas bostandyǵynan aıyrylýy múmkin. Sondaı-aq, jeke múlki tárkilenedi.
Polıtseılerdiń aıtýynsha, Ózbekstan azamattary kóshi-qon zańnamasyn buzǵany úshin ákimshilik jaýapkershilikke tartylmaıdy. Óıtkeni, olar adam saýdasynyń qurbandary dep tanyldy jáne polıtseıler men qoǵamdyq uıymdardyń qorǵaýynda bolady.
