Qostanaıda 18 ata-ana balalaryn tárbıeleýden bas tartqan
QOSTANAI. QazAqparat - Qostanaı oblystyq ıývenaldy polıtsııa qyzmetkerleri «Jasóspirim» profılaktıkalyq is-sharasyn ótkizdi, dep habarlaıdy QazAqparat oblystyq ІІD baspasóz qyzmetine silteme jasap.
«Jasóspirim» profılaktıkalyq is-sharasy bastalǵan osy apta ishinde 236 jasóspirim ІІD qyzmetkerleriniń nazaryna ilikti. Onyń ishinde 192 jas ákimshilik zańbuzýshylyqqa jol bergen. Sondaı-aq, ata-anasynyń baqylaýynsyz túngi ýaqytta kóshede júrgen basqa balalar da tekserildi.
«Balalaryn tárbıeleýden bas tartqan 18 ata-anaǵa qatysty ákimshilik is qozǵaldy. Jalpy, reıd barysynda kámelet jasyna tolmaǵan 173 bala tún ýaqytynda ata-anasynyń baqylaýynsyz qydyryp júrgen. Buǵan qosa, jasóspirimderge alkogol ónimderi men temeki satqan 11 eresek adamǵa aıyppul salyndy», - dedi ІІD baspasóz qyzmetindegiler.
Reıd kezinde kámelet jasyna tolmaǵan 27 bala tirkeýge alyndy. Tekserý barysynda ıývenaldy polıtsııa qyzmetkerlerimen birge oblystyq bilim basqarmasynyń mamandary da boldy.
