Qostanaıda 17 jastaǵy ákki ury ustaldy
QOSTANAI. QazAqparat - Tártip saqshylary urlyq jasaýdy daǵdyǵa aınaldyryp alǵan 17 jastaǵy jasóspirimdi ustady, dep habarlaıdy «Qostanaı tańy» gazeti.
Oqıǵa Qarabalyq aýdanynda bolǵan. Ury bala kórshisiniń úıine túsken. Ol bul áreketti tún ortasynda júzege asyrǵan. Bóten úıge esh kedergisiz kirgen, bul kezde shańyraq ıeleri qalyń uıqyda jatqan. Qarańǵy bólmelerdi tintip júrip, úı ıesiniń sómkesin taýyp alady. Ámııanyn aqtaryp, ishinen 39 myń teńgeni jymqyryp, kelgen izimen zyp beredi. Qojaıyndar tonalǵandaryna tańerteń kóz jetkizip, polıtseılerge qońyraý shalǵan. Dánikken jasóspirim araǵa kóp ýaqyt salmaı aram pıǵylyn jalǵastyrady. Áýeli áldebir avtokóliktiń esigin buzyp, navıgatsııa qurylǵysyn sýyryp áketken. Keıin taıaý mańdaǵy dúkenge túsip, kóńili qalaǵan, sómkesine syıǵannyń barlyǵyn alyp, taıyp turǵan. Kelesi kúni ol tártip saqshylarynyń qolyna bos sómkesimen ustaldy. Shyǵyn kólemi eseptelip, sotqa deıingi tergeý amaldary júrgizilýde. Mundaı qylmysqa ol birneshe márte barǵan. Ol turmysy tómen, berekesizdeý otbasynda "tárbıe" kórip keledi eken.
Taıaýda aýdandyq ákimdik janyndaǵy kámeletke tolmaǵandar isi jáne olardyń quqyǵyn qorǵaý jónindegi komıssııanyń kezekti otyrysy ótti. Jıynda tártipsiz balanyń anasyn ata-ana quqyǵynan aıyrý, sondaı-aq jasóspirimdi arnaıy mekemege jóneltý máseleleri qaraldy.
Batyr Jolaıuly
