Qostanaıda 1600-den astam adamǵa qaryz berip, 579 mln teńge tapqan eki adam sottaldy
ASTANA. KAZINFORM — Qostanaı oblysynyń eki turǵyny lıtsenzııasyz zańsyz mıkroqarjylyq qyzmet júrgizgeni jáne qylmystyq jolmen alynǵan kiristerdi zańdastyrǵany úshin sottaldy.
Tergeý derekterine qaraǵanda, olar 2024–2025 jyldary ózderine baǵynysty tórt kompanııanyń — «Soıýz-Kostanaı» JShS, «Ekspress Tenge» JShS, «Express Gold» JShS jáne «Express.com» JShS-niń jumysyn uıymdastyrǵan.
Bul jeli negizinen oblystyń aýdan ortalyqtary men kentterinde jumys istegen. Klıentterge bankter men ózge de qarjy uıymdaryna júginbeı, zergerlik buıymdaryn kepilge qoıyp aqsha alý usynylǵan.
Іs júzinde komıssııalyq saýda degen jeleýmen azamattarǵa múlkin kepilge qoıý arqyly aqsha berilgen. Berilgen aqshany paıdalanǵany úshin kún saıyn 0,4 paıyz mólsherinde syıaqy alynǵan.
Alaıda klıenttermen jazbasha qaryz sharttary jasalmaǵan. Mámilelerdi zańdy komıssııalyq qyzmet retinde kórsetý úshin birqatar formaldy qujat rásimdelip, olarda syıaqy taýardy satýdy keıinge qaldyrǵany úshin alynatyn komıssııa nemese ony saqtaǵany úshin tólem dep kórsetilgen.
Eki jyl ishinde olardyń qyzmetin 1 600-den astam azamat paıdalanǵan. Zańsyz qyzmetten túsken kiris 579 mıllıon teńgeden asqan.
Sot ekeýin de múlkin tárkileı otyryp, 2 jylǵa bas bostandyǵynan aıyrdy. Tárkilengen múliktiń qatarynda bes páter, úsh avtokólik jáne eki jer telimi bar.
Sot úkimi zańdy kúshine engen joq.
Aıta ketelik SQO-da zańsyz mıkroqarjylyq qyzmetpen aınalysqan turǵyn sottalǵan edi.
