Qostanaıda 16 adam ýlanǵan dámhana ıesiniń ústinen sotqa aryz túsirildi
QOSTANAI. QazAqparat - Qostanaı oblysynyń Tutynýshylar quqyǵyn qorǵaý departamenti «Vetka sakýry» dámhanasynyń ıesi - jeke kásipker S.N.Kazaktyń qyzmetin toqtata turý týraly talaparyzben sotqa júgindi.
Talaparyzdyń sebebi - atalmysh tamaqtandyrý ornynda sanıtarlyq qaǵıdalar talaptaryn buzýshylyq oryn alǵan. Saldarynan qalalyq aýrýhananyń ınfektsııalyq bólimshesine ýlanyp qalǵan 16 qostanaılyq túsken. Departamenttiń talaparyzy týraly Qostanaı oblysynyń mamandandyrylǵan aýdanaralyq ekonomıkalyq sotynyń baspasóz qyzmetinen habarlady.
Budan buryn habarlanǵandaı, naýqastarda salmonellez taıaqshasy anyqtalǵan. Olardyń bári sol dámhanadan tamaqtanǵandaryn aıtqan. Qostanaı qalalyq tutynýshylardyń quqyqtaryn qorǵaý basqarmasynyń basshylyǵy Bas prokýratýradan jeke kásipkerdiń qyzmetin tekserýge ruqsat alýǵa qol jetkizdi. Tekserý barysy epıdemıologtardyń kúdigin rastady: dámhanada kóptegen sanıtarlyq qaǵıdalardy buzýshylyqtar anyqtalǵan. Olardyń barlyǵy departamenttiń kásipkerdiń atyna bergen talaparyzynda aıtylǵan. Atap aıtqanda, onyń tipti nysannyń jumys isteýine ruqsat beretin sanıtarlyq-epıdemıologııalyq qorytyndysy da bolmaǵan. Sondaı-aq jartylaı daıyn ónimder men daıyn ónimderdiń bir jerde saqtalýy, ydys óńdeıtin tıisti jaǵdaılaırdyń qarastyrylmaýy, ónimderdiń qaıdan shyǵarylǵany jáne sapasy týraly sertıfıkattardyń bolmaýy tárizdi ereje buzýshylyqtar oryn alǵan. Sonymen qatar, tekserýshiler aspazdyń qolynyń shaıyndysy men tońazytqysh sórelerinen salmonellez qozdyrǵyshyn tapqan.
