Qostanaıda 15 medıtsına qyzmetkerine memlekettik nagradalar tapsyryldy
QOSTANAI. QazAqparat - Memleket basshysy Qasym-Jomart Toqaevtyń Jarlyǵyna sáıkes, Qostanaı oblysynyń 15 medıtsına qyzmetkeri ordendermen, medaldarmen jáne Qazaqstan Respýblıkasynyń Qurmet gramotalarymen marapattaldy, dep habarlaıdy QazAqparat oblys ákiminiń baspasóz qyzmetine silteme jasap.
Marapattaý rásimi búgin oblystyq fılarmonııada ótti. Oblys ákimi Arhımed Muhambetov indetke qarsy kúrestiń eń aldyńǵy shebinde medıtsına qyzmetkerleriniń júrgenin atap ótti.
«Qazir búkil álem koronovırýs ınfektsııasynyń etek alýyna baılanysty asa kúrdeli kezeńdi bastan keshirip jatyr. Sizder adam ómiri men densaýlyǵy úshin bolyp jatqan kúrestiń únemi aldyńǵy qatarynda bola bildińizder.
Búginde oblystyń densaýlyq saqtaý salasynda 15 myń medıtsınalyq qyzmetker eńbek etedi. Onyń 1800-i dáriger mamandar bolsa, 6 myńnan astamy – orta medıtsına qyzmetkerleri.
Aımaqta myńnan astam medıtsına qyzmetkeri indetke qarsy kúres júrgizýde. Olarǵa 2 mlrd teńgeniń ústinde qosymsha ótemaqy tólendi», - dep atap ótti oblys basshysy marapattaý rásiminde sóılegen sózinde.
Qazir óńirdiń densaýlyq saqtaý salasyn mamandarmen qamtý jumysy jalǵasýda. 2019 jyly Qostanaı oblysyna 265 dáriger kelse, bıyl densaýlyq saqtaý salasyna barlyǵy 227 maman shaqyrtylyp otyr. Óńirge kelgen dárigerlerge ústemaqy tólenip, baspana berilýde.
Búgingi jıynda «Qurmet» ordenimen ıe bolǵan oblystyq jedel járdem stansasynyń bas dárigeri Irına Shteıgervald Prezıdent Qasym-Jomart Toqaevqa shynaıy alǵysyn arnady.
«Eń aldymen Memleket basshysyna dárigerlerge qamqorlyq pen qoldaý kórsetip jatqany úshin rızashylyq bildiremin. Meniń jumysymdy joǵary baǵalaǵandaryńyz úshin shyn júrekten qýanyp turmyn. Pandemııa medıtsına qyzmetkerlerin jumyla jumys isteýge úıretti. Pandemııa bizdiń árqaısymyzdy árbir naýqasqa erekshe nazar aýdara bilýge úıretti. Eń bastysy biz kóp bolyp komandamen jumys isteýge úırendik. Men búgin joǵary memlekettik nagradalarmen marapattalǵan árbir medıtsına qyzmetkerin maqtan etemin», - deıdi dáriger.
