Qostanaıda 1,5 keliden astam esirtki tasymaldaǵan kýrer ustaldy
ASTANA. KAZINFORM — Qostanaı qalasynda óńiraralyq baǵytta esirtki tasymaldaǵan ınternet-dúkenniń kýreri ustaldy.
Іshki ister mınıstrliginiń málimetinshe, 25 jastaǵy kúdikti el óńirleri arasynda esirtkiniń iri partııalaryn tasymaldap, keıin olardy jasyryn oryndarǵa jetkizýmen aınalysqan.
Tergeý barysynda onyń qylmystyq áreketin jasyrý úshin esirtki zattaryn vakýýmdyq qaptamaǵa salyp, qurǵaq sút qaptamalarynyń ishine jasyrǵany anyqtaldy. Mundaı tásil tasymaldaý kezinde kúdik týǵyzbaý jáne esirtkini anyqtaýdy qıyndatý úshin qoldanylǵan.
Kúdiktini ustaý kezinde zańsyz aınalymnan jalpy salmaǵy 1,5 keliden asatyn esirtki zattary tárkilendi. Onyń ishinde metkatınon psıhotroptyq zaty men keptirilgen marıhýana bolǵan.
Saraptama qorytyndysyna sáıkes, tárkilengen esirtki kólemi 10 myńnan astam bir rettik dozaǵa teń. Osylaısha, onyń yqtımal tutynýshylarǵa taralýyna jol berilmegen.
Qazir polıtsııa qyzmetkerleri qylmystyq shemany uıymdastyrýshylardy, esirtkini jetkizý arnalary men ınternet-dúken jumysyna qatysy bar ózge de tulǵalardy anyqtap jatyr.
ІІM ınternet arqyly esirtki saýdasyna qatysqandarǵa, onyń ishinde uıymdastyrýshylarǵa, operatorlarǵa, «jasyryn orynǵa qaldyrýshylarǵa» jáne kýrerlerge zań boıynsha qatań jaýapkershilik qarastyrylǵanyn eskertti.
Eske salaıyq, buǵan deıin esirtki saýdasynan túsken kiristi zańdastyrǵan kúdikti Grýzııadan ekstradıtsııalanǵanyn habarlaǵanbyz.
